Yrysty qalanyŋ yntymaq merekesı
Keşe elordanyŋ tükpır-tükpırınde Qazaqstan halqynyŋ bırlıgı künı qyzu toilandy. Eŋ ülken merekelık şara bas qalanyŋ qaq törıne qonys tepken «Qazaq elı» monumentı maŋyndaǧy alaŋda öttı. Oǧan Elbasy Nūrsūltan Nazarbaev qatysty.
Sondai-aq qala äkımdıgınıŋ aldyndaǧy alaŋda, qala ırgesındegı tūrǧyn üi alaptarynda halyqtyq seruender ūiymdastyryldy. Künnıŋ şuaǧymen jylynǧan jūrtşylyq merekelık ıs-şaralarda ötken konsertterge, sporttyq saiystarǧa jäne türlı şyǧarmaşylyq baiqaularǧa qatysyp, köŋıl küilerın köterdı.
Tūŋǧyş Prezident şahar tūrǧyndary men qonaqtary aldynda söilegen qūttyqtau sözınde:
– Babalarymyz bırlıktıŋ arqasynda barlyq qiyndyqty eŋserıp, bız üşın osyndai Ūly dalany saqtap qaldy. Bız olardyŋ armanyn oryndap, täuelsız Qazaqstandy qūrdyq. Endı sol bırlıgımızdı saqtap, täuelsızdıgımızdı qūrmetteuımız kerek. Damu baǧdarlamalarymyzdy jüzege asyru elımızdıŋ bolaşaǧyn odan ärı jarqyn ete tüsedı, – dedı.
Jinalǧan jūrtşylyq körıgı qyzǧan dumandy tamaşalap mäz-meiram. Astanadaǧy etnomädeni ortalyqtar jeke būryştaryn jasap, salt-dästürlerıne qatysty zattaryn körmege şyǧarypty. Aralap jürıp, tatar-başqūrt mädeni ortalyǧy ūsynǧan jädıgerlerdıŋ janyna jaqyndadyq. Atalǧan ūiymnyŋ ökılı Ǧaliia Rahmatullina köpşılık tarapynan ūlttyq kiımderge degen qyzyǧuşylyq öte joǧary ekenın aitady.
– Mysaly, tatarlardyŋ töbetei, kelepuş, kriaşen, börek dep atalatyn bas kiımderın sūrauşylar köp. Būlar bır-bırınen pışınderı arqyly ajyratylady, – deidı ol.
Al armian mädeni ortalyǧy jasaǧan būryşta taǧamnyŋ nebır türı tolyp tūr.
– Būl – agans atty tättımız. Ony bidai, meiız jäne jaŋǧaqty aralastyryp jasaimyz. Al myna as basturma dep atalady. Mūny qazaqtyŋ sür etımen salystyruǧa bolady. Äuelı ettı tūzǧa salyp, keiın keptıremız. Dämı keremet, – deidı armian jeksenbılık mektebınıŋ direktory Aiastan Mneian.
Alaŋda elordaǧa äigılı kompozitor, «Radima» belarus mädeni ortalyǧynyŋ ökılı Dmitrii Ostankovichtı de jolyqtyrdyq. Onyŋ aituynşa, qazırgı taŋda astanada 4 myŋdai belarus tūrady. Olardyŋ bärı är meiramdy qazaqstandyqtarmen bırge toilaudy dästürge ainaldyrypty.