Ūstazdar merekesın erekşe jaqsy köremın. Öitkenı bärımız de bala bolyp, mektepke bardyq. Ardaqty ūstazdardyŋ tälımın aldyq. Önegesın üirendık. Sol arqyly ömırden öz jolymyzdy tauyp, eŋbek etıp jürmız. Bügıngı jetkınşekter de erteŋ solai bolady. Ömır zaŋy sol… Bärı de kezekpen-kezek almasqan dünie.
Ūstaz – men üşın qasiettı ūǧym. Kie qonǧan adam dep qūrmetteimın. Ärine, ekınıŋ bırı oǧan jete qoimas. Bıraq sondai tūlǧalardyŋ barlyǧyna senemın. Öitkenı ony özım kördım. Mektepte oqyp jürgende, bızge tarih pänınen Moldahmet Qojahmetov degen kısı sabaq berdı. Qysqaşa Moldan aǧai dep aituşy edık. Öte parasatty, salmaqty, ziialy adam edı. Jas kezınde qoǧamdyq jūmystarǧa belsene aralasyp, partiia salasynda eŋbek etken. Bız aǧaidyŋ sabaǧyn asyǧa kütemız. Öitkenı ol sabaqty özgeşe ötkızedı. Är sabaǧy bır-bırıne ūqsamaidy. Qūr jattap kelgendı ǧana sūrap qoimai, tyŋ oilar aityp, oquşyny ızdenuge jeteleidı. Ötken tarih pen bügıngı kündı sabaqtastyryp otyrady. Är sabaqtyŋ aldynda 2-3 minut elımızde bolǧan özgerısterge toqtalady. Telearnada aitylǧan resmi jaŋalyqtarǧa şolu jasaidy. Sosyn baryp qana sabaqqa kırısedı. Söitıp, bız de jaŋalyq köruge, ömırge belsendı qarauǧa üirendık. Tömen oqityn oquşylarǧa jeŋıl sūraqtar qoiyp, olardy äŋgımege tartyp, kötermelep otyruşy edı.
Ras aitsam, mektepte jürgende osy süiıktı aǧaiyma qatty elıktedım. Sol kısı sekıldı taza kiınıp, mūǧalım bolǧym keletın. Äp-ädemı än salatyn äuezdı dauysy da bar edı. Moldan aǧai 10-synypta oqyp jürgende, bır-ekı kün ǧana auyryp, tosynnan dünie saldy. Ūstazymyzdy soŋǧy saparǧa şyǧaryp saluǧa synyp bolyp bardyq. Bärımız asyl aǧaiymyzdy qimai, ıştei egıldık.
Sodan berı jiyrma jyldan asa uaqyt öttı. Bız de eseidık. Bıraq köŋılıme nūr, ömırıme qazyq bolǧan ardaqty aǧaiymnyŋ beinesın bır sät te oiymnan şyǧarǧan emespın. Qandai da bır mektepke barǧanda, sol kısı sekıldı mūǧalımder kezdesıp qala ma dep alaŋdap tūramyn. Mıne, ūstaz ūlaǧaty degen osy dep oilaimyn.
Keiıngı jyldary qoǧamda ūstazdyŋ abyroiy men märtebesı turaly söz köp aitylady. Bıreu aqtaidy, bıreu dattaidy. Sonda da osy qasterlı mamandyqtyŋ qadırı būrynǧydai emes. El ışınde de mūǧalım märtebesınıŋ salmaǧy ortaiyp qalǧan sekıldı. Onyŋ da türlı sebepterı bar. Degenmen ūstazdyŋ orny qaşanda bölek. Elge tanylǧan aqyn da, ǧalym da, qairatker de sonyŋ aldynan ötedı. Sondyqtan kökıregımızge bılım närın qūiǧan ūstazdy ūlyqtai bıleiık!
Azamat ESENJOL
