Jastardy jalǧan dıni aǧymdardyŋ arbauynan saqtau maqsatynda Astana qalasy äkımdıgı men Dın problemalaryn zertteu ortalyǧy ekstremizm men terrorizmge qarsy aqparattyq tüsındıru jūmystaryn bastady. 5 qazanǧa deiın Astanadaǧy bırqatar joǧary oqu oryndarynyŋ studentterı dın ökılderımen kezdesıp, destruktivtı jalǧan toptar jaiyndaǧy maŋyzdy aqparattarmen tanysady.
Dın mäselelerı jönındegı aqparattyq-tüsındırme toptarynyŋ alǧaşqy jiyndarynyŋ bırı S. Seifullin atyndaǧy Qazaq agrotehnikalyq universitetı men Qazaq tehnologiia jäne biznes universitetınde öttı. Mūnda «Nūr Astana» ortalyq meşıtınıŋ naib-imamdary Nūrlan Ramazanov pen Marat Bektazinov studentterge adasqan toptardyŋ sipaty men maqsattaryn äŋgımeledı. «İslam – beibıtşılıktı nasihattaityn taza dın. Paiǧambarymyz (Oǧan Allanyŋ salauaty men sälemı bolsyn) «Naǧyz mūsylman özgelerge tılımen de, qolymen de ziian keltırmeidı» degen. Qazırgı taŋda islamnyŋ atyn jamylǧan terıs aǧymdar bar. Olar Qūrannyŋ aiattary men Rasulallahtyŋ hadisterın būrmalap tüsındırgen kösemderdıŋ artynan soqyr erıp, sanalary san saqqa jügırıp, adasyp jür. Ūlttyq qūndylyqtarymyz ben ädet-ǧūryp, salt-dästürımızdı özgertuge, soǧan qarama-qaişy äreket etuge şaqyrady. Olardan saq bolyŋyzdar. Negızgı dıni mälımettı senımdı közderden, iaǧni bılımı bar arnaiy oryndardan alǧan jön. Terrorlyq äreketterdı jalaulatatyn adasuşylar Qūrannyŋ aiattaryn būrmalap, tura maǧynasynda qabyldaidy. Mäselen, qasiettı Qūran Kärımde «Allanyŋ jolynda şynaiy jihad jasaŋdar» degen aiat bar. Sony sözbe-söz tüsınıp, aram piǧyldaryna paidalanady.
Jastardyŋ dıni sauatyn arttyryp, ekstremizm men terrorizmdı aldyn aludy közdeitın jiyn barysynda derektı film körsetılıp, keluşılerge «Bılgenıŋız maŋyzdy» atty jadynamalar taratyldy. Mūnda destruktivtı kult pen jalǧan dıni aǧymdardyŋ basty belgılerı körsetılgen.
Qala äkımdıgıne qarasty Dın problemalaryn zertteu ortalyǧynyŋ basşysy Jüsıp Jūmaǧūlovtyŋ aituynşa, elordadaǧy dıni ahualdy tūraqty nazarda ūstau baǧytynda bırqatar saraptamalar jürgızıledı. Mäselen, ortalyq bılıktı mamandar men potensialdy radikaldardyŋ qatysuymen tereŋdetılgen sūhbattardy ūiymdastyrady.
Mädina JAQYP
