Nūr-Sūltanda qala tūrǧyndaryna körsetıletın qyzmetterdı «bır tereze» arqyly bırıktırıp, otbasylarmen jeke jūmys jürgızetın «Janūia» ortalyǧy aşyldy. QR Premer-ministrınıŋ orynbasary Berdıbek Saparbaev pen qala äkımı Altai Kölgınov zaŋgerlık, äleumettık jäne psihologiialyq kömek körsetetın jaŋa ortalyqtyŋ aşylu räsımıne qatysyp, jūmys baǧytymen tanysty.
Ortalyqtyŋ «Open space» alaŋynda elordalyqtar jūmys tabu, biznes aşu, özın tolǧandyrǧan äleumettık mäsele boiynşa aqparat pen keŋes alady. 12 memlekettık jäne kvazimemlekettık sektor jūmys ısteitın ortalyqtyŋ mamandary AÄK alu, käsıptık oqudan ötu, jūmysqa ornalastyru, jappai oqytu baǧdarlamasyna qatysu, balabaqşaǧa kezekke qoiu, qamqorşylyqty ornatu, järdemaqylardyŋ barlyq türlerın jäne t. b. alu mäselelerı boiynşa qyzmet körsetedı.
QR Premer-ministrınıŋ orynbasary Berdıbek Saparbaev: «Azamattar özınıŋ qabıletıne qarai 3-6 ailyq kurstardy oqyp, ekonomikaǧa kerek mamandyqty alady, oǧan 16 myŋ teŋge stipendiia tölenedı. Memlekette jürıp jatqan memlekettık baǧdarlamalardan habardar bolyp, memlekettıŋ qoldauyn paidalanu kerek. «Anau joq, mynau joq» dep otyra bersek eşkım eşteŋe äkep bermeidı. Äleumet salasyndaǧy ıs-şaralardyŋ barlyǧy halyqqa arnalǧan. Mūqtajdyq pen masyldyqty ajyrata bılgen jön. Maqsat – jastar, eŋbekke qabılettı adamdar jūmys ıstesın. Ortalyqtyŋ maqsaty öte dūrys, qala äkımşılıgıne rahmet» dedı.
Qala äkımı Altai Kölgınov būl ortalyqtyŋ tūrǧyndar sūranysymen aşylǧanyn, azamattarmen jeke qabyldau ötkızu barysynda osyndai ortalyqtyŋ qajettılıgıne köz jetkenın tüsındırıp öttı. «Azamattar mäselelerımen qyzmet körsetu ortalyǧyna, äleumettık kömek körsetu ortalyǧyna barady, eŋ soŋynda qaitadan äkımge kelemız deidı. Osy sebeptı az qamtylǧan otbasylarǧa arnalǧan otbasy qūndylyqtaryn qoldaityn ortalyq aştyq. Az qamtylǧan otbasylar müşelerınıŋ köbınde diplom joq, olar kurstar oqysa, jūmys oryndaryna maman daiarlasaq, şaǧyn biznestı aşyp aiaqqa tūrǧandar, ısker äielder öz täjıribesımen bölısse deimız» dedı şahar basşysy.
Aita ketu kerek, ortalyqtaǧy «Käsıpker ana» qoldau ortalyǧy köpbalaly jäne az qamtylǧan otbasylarǧa öz käsıbın aşuǧa jan-jaqty kömek körsetpek. Onyŋ aiasynda ömırlık täjıribelerımen bölısetın tabysty «Self made» äielderımen motivasiialyq biznes treningter ötedı. Qala äkımı Altai Kölgınov ortalyqtyŋ mümkındıkter alaŋyna ainalatyna senım bıldırdı. «Bız keleşekte ortalyqty sūranysqa säikes damyta beremız. Būl jerge kelse üi beredı degen tüsınık dūrys emes, azamattarǧa öz mümkındıkterın paidalanuda ortalyqtaǧy bükıl maman atsalysady. Memleket tarapynan barlyq qoldau jasalyp jatyr, degenmen ata-ana balalar aldyndaǧy öz jauapkerşılıgın ūmytpau kerek. Jeke qabyldauǧa ärtürlı mäselemen keledı, kei otbasylardyŋ ekı ne üş nesie alǧanyn köremız. Jaraidy, bırınşı nesie mūqtaj bolǧasyn alǧan şyǧarsyz, al üşınşı nesienı nege aldyŋyz degenge «smartfon aldym» dep jauap beredı. Smartfon aldyŋyz, balalaryŋyzǧa kömektese almai otyrsyz, al banktıŋ qarajatyn qaitaru kerek, būl qarjylyq sauattylyqtyŋ jetkılıksızdıgın körsetedı. Sondyqtan qarjylyq sauattylyqqa qatysty da treningter ötkızu josparda bar. Qala şetındegı auyldarda tūratyndar nesiege smartfon alǧanşa mal alsa, balany baǧuǧa bolady, ärı balalar eŋbekke üirenedı. Sol üşın bız halyqty eŋbek etuge şaqyruymyz kerek. Eŋbeksız eşbır memleket öspegen, damymaǧan. Bızdıŋ mındetımız – mümkındık tuǧyzu jaǧdai jasau» dedı qala äkımı Altai Kölgınov.
«Janūia» ortalyǧynda qala äkımınıŋ aşyq qoǧamdyq qabyldauy jūmys ısteidı. Bekıtılgen kestege säikes azamattardy qabyldaudy audan äkımderı, basqarmalar men basqa ūiymdardyŋ basşylary da jürgızetın bolady.
Jadyra ŞAMŪRATOVA
