Seisenbı künı qazaq janküierı bır quanyp qaldy. Äzerbaijan ūlttyq qūramasymen joldastyq kezdesu ötkızgen Qazaqstan ūlttyq qūramasy aiqyn basymdyq tanytty. Stanimir Stoilov baptaityn qazaq futbolşylary 3:0 esebımen jeŋıske jettı.
«Astana Arena» stadionyna jinalǧan 22500 janküier oiynnyŋ 12-minutynda oryndarynan tık tūryp, alǧaşqy goldy soqqan Roman Mūrtazaevqa jäne oǧan ädemı pas şyǧarǧan Bauyrjan İslamhanǧa qoşemet körsettı. Arada ekı-aq minut ötkende Mūrtazaevtyŋ özı jartylai qorǧauşymyz Mujikovtyŋ aiaǧyna dop salyp berdı. Serıkjan bolsa sättı mümkındıktı mült jıbermei, eseptı eseledı.
Ekı minutta ekı dop ötkızıp alyp, eseŋgırep qalǧan Äzerbaijan jıgıtterı qanşa tyrysqanymen, Erich qaqpasynan saŋylau taba almady. Oiynnyŋ bırınşı bölıgı osylaişa 2:0 esebımen aiaqtaldy.
Ekınşı taimda oiyn ürdısı özgere qoiǧan joq. Ekı jaq ta alma-kezek şabuyldar ūiymdastyryp, eseptı eseleuge ūmtylyp-aq baqty. Joldastyq kezdesu bolǧan soŋ ekı jaqtan da bes oiynşydan almasty. Solardyŋ bırı Qazaqstan qūramasyndaǧy eŋ jas oiynşy Baqtiiar Zainutdinov matchtyŋ 90-minutynda Äzerbaijan qūramasynyŋ qaqpasynda üşınşı ret ala dopty tulatyp tüsırdı.
Osy oiynnan tüigenımız, «Astana» komandasyn tört ret qatarynan Qazaqstan chempiony etken, ekı ret Chempiondar ligasynyŋ toptyq turnirıne şyǧarǧan bolgar mamany Stanimir Stoilovtyŋ «şeberlık qoltaŋbasyn» anyq aŋǧardyq. Būl jeŋıs biyl küzde bastalatyn UEFA aiasyndaǧy Ūlttar ligasyna ümıtpen qaratty. Osyndai oiyn örnegın saqtap, şeberlıgın ūştai tüsse, Qazaqstan qūramasy aldaǧy Europa chempionatyna da joldama alyp qalar degen oi da qylaŋ bergendei.
