Jas patriottarmen didarlasty
Burabaidaǧy «Baldäuren» respublikalyq oqu-sauyqtyru ortalyǧy ondaǧan jyldan berı oquşylarǧa jyl boiy qyzmet etıp keledı. Onda är auysym saiyn elımızdıŋ barlyq öŋırınen jüzdegen bala kelıp, oquyn üzbei, demalu dästürge ainalǧan.
Būrynǧy kezde mūndai oquşylar lagerı Qyrymda bolatyn. Ony «Artek» dep ataǧan. «Artekke» baryp-qaitu ūl men qyzdyŋ armany sanalatyn. Qazır azat elımızdıŋ «Baldäuren» keşenı sondai ürdıste qyzmet etıp otyr. Bır atap aitarlyǧy, alǧaşqy kezde Burabaida ǧana bolsa, qazır elımızdıŋ özge öŋırlerınde de bölımşelerı qūryla bastady. Atap aitqanda, Almaty, Türkıstan oblystarynda oquşylar lagerı bırneşe jyldan berı jūmys jasau üstınde. Osy bölımder arqyly ozat balalardy «Baldäurenge» jıberu de dästürge ainalyp otyr.
Jaqynda «Baldäurennıŋ» bır bölımşesı sanalatyn «Baldäuren-Qapşaǧai» respublikalyq oqu-sauyqtyru ortalyǧynda taqyryptyq şara öttı. Oǧan Halyq Qaharmany, Parlament Mäjılısınıŋ deputaty Baqytjan Ertaev arnaiy baryp qatysyp, demalyp jatqan oquşylarmen didarlasty. Būl igılıktı şaraǧa atalmyş ortalyqtyŋ bas direktory M.Tölepbai, «Nūr Otan» partiiasy» Qapşaǧai qalalyq filialynyŋ töraǧasy E.Nūrpeiısov, özge de azamattar qatysty.
Şaraǧa qatysuşylar «qazaqstandyq jas patriottyqtar akademiiasy» qūrylymy boiynşa berılıp jatqan tärbie täsılderımen tanysty. Halyq qalaulysy mūndai jaqsy qadam barlyq jerde örıs aluy kerektıgın eske saldy. Belsendı oquşylarǧa «Qazaqstannyŋ jas patriottary» tösbelgısın tapsyryp tūryp, B.Ertaev būl ülken jauapkerşılık jükteitının, patriottyq sezım osyndai ızdenısterdıŋ nätijesınde qalyptasatynyn tılge tiek ettı. Sonymen qatar, bügıngı Qazaq elınıŋ bar arman-aŋsary el täuelsızdıgın bekem etu ekenın de eske saldy. Didarlasu üstınde Elbasy Joldauynda aitylǧan halyqtyŋ äleumettık jaǧdaiyn köteru jaiyndaǧy tapsyrmalar söz bolyp, äsırese, ūstaz märtebesın köteru, būl ıste oquşylardyŋ mūǧalımderın qūrmetteu qajettıgın nazarǧa salyp, aldaǧy jyly bolatyn «Jastar jylyna» qatysty oilaryn da aitty.
Qasym-Jomart SÜLEIMEN