«Astana jastary» KMM volonterler toby men qala mesenattary Halyqaralyq qarttar künıne orai «Ardagerlerdı aialaiyq» jäne «Qamqorlyq mekenjaiy» atty aksiia ötkızdı.
Aksiia aiasynda volonterler toby azyq-tülık sebetterın jalǧyz tūratyn zeinetkerlerge, mümkındıgı şekteulı jandarǧa, tyl eŋbekkerlerı men Ūly Otan soǧysynyŋ ardagerlerıne tabystady. «Bügın Halyqaralyq qarttar künıne orai qariialarǧa azyq-tülık taratudy jalǧastyryp otyrmyz. Būl bızde jyl boiy ūiymdastyrylyp tūrady. Al jūmsalatyn qarjyny qalalyq äkımdıkten almaimyz. Ony qaiyrymdy jandar böledı. Niet bıldırgen kısıler bızdıŋ ortalyqqa qalaǧan mölşerde qarjy audaryp jatady. Bız ony qaiyrymdylyqqa baǧyttaimyz» dedı «Astana jastary» KMM erıktıler qozǧalysyn damytu bölımınıŋ mamany Aizat Äli.
Jastardy qaiyrymdylyqqa, qarttarǧa qarailasuǧa baulityn igılıgı mol ıs osyǧan deiın de ötkızılıp kelgen. Atap aitqanda, soŋǧy 2 ai ışınde 80-nen asa sebet taratylypty. Volonterler «Erıktıler mektebınde» komandany qūru jäne türlı bılıktılıkterın arttyru üşın oqytudan ötedı. Qazır ortalyqta tūraqty 300 erıktı bar. Olar qalalyq, halyqaralyq, ekologiialyq jäne äleumettık ıs-şaralarǧa qatysady.
Farida KARİMOVA
