Bas qalada küzgı kögaldandyru jūmystary qarqyn aldy. Biylǧa josparlanǧan 1 millionǧa juyq jasyl jelektıŋ 800 myŋy qala syrtyndaǧy orman alqaptaryna, al qalǧan 200 myŋy qala ışınde otyrǧyzylady.
Būl rette bas qaladaǧy 4 audan boiynşa 600-den astam qyzmetker, olardan bölek arnaiy mamandar da osy maqsatqa jūmyldyrylǧan. Äsırese «Astana-Kögaldandyru Qūrylys» JŞS-nıŋ jūmysşylary jasyl jelek otyrǧyzudan bölek, ony qyrqu, tazalau, suaru jūmystaryn tügel atqaryp jür. Köşe boiynda otyrǧyzylǧan gülder arnaiy jylyjaida baptalady. Sondai-aq onda köptegen dekorotivtık būtalar men aǧaştar ösırıledı.
Mamandardyŋ aituynşa, qalanyŋ güldenuın küzdıŋ qara suyǧyna deiın saqtap tūru üşın arnaiy köpjyldyq gül köşetterı otyrǧyzylǧan.
«Byltyrǧy jylmen salystyrǧanda biyl bır jyldyq gül köşetterı bırşama az. Sebebı ornyna köpjyldyq gül köşetterı otyrǧyzylyp jatyr. Būl elordamyzda erte köktemnen bastap, küreŋ küzge deiın gülder jaiqalyp tūrady degendı bıldıredı. Osy jūmystardyŋ bärı qala tūrǧyndary men qonaqtarynyŋ jailylyǧy üşın jasalyp jatyr» dedı «Astana-Kögaldandyru Qūrylys» JŞS öndırıstık-tehnikalyq bölımınıŋ bas mamany Nūrǧazy Üsen.
Mekeme qyzmetkerlerı osy küzde de qyzǧaldaqtar egudı josparlap qoiǧan. Ol kelesı jyldyŋ köktemınde bürşık jarady.
