Ūlttyq muzeide Batys Qazaqstan oblystyq tarihi-ölketanu muzeiınıŋ ūiymdastyruymen Jaiyq boiyndaǧy qylqalam şeberlerı tuyndylarynan toptasqan «Jazira – Jaiyq» atty körme aşyldy.
Oral öŋırı – Europa men Aziianyŋ toǧysqan jerı. Sondyqtan da būl jerde beineleu önerı erteden qanat jaiǧan. Bügınde aimaqta Qazaqstan suretşıler odaǧynyŋ 30-ǧa tarta müşesı bar. Olar beineleu önerınıŋ grafika, keskındeme, sändık-qoldanbaly jäne müsın janrlary boiynşa jūmys ısteidı. Qazır oraldyq qylqalam şeberlerınıŋ kartinalary respublikalyq, halyqaralyq körmelerge qoiylyp, bılıktı synşylar tarapynan joǧary baǧalanyp jür. Sondai-aq soŋǧy on jyldan berı «Jazira – Jaiyq» atauymen aimaq suretşılerınıŋ elımızdıŋ Aqtöbe, Atyrau, Almaty şaharlary men Reseidıŋ Ufa, Samara qalalarynda körmesı ūiymdastyrylǧan.
Körmege qoiylǧan tuyndylar arasynda ömırden erte ötken bıtımı bölek suretşı Säken Ǧūmarovtyŋ kartinalary özgeşe örnegımen, tosyn qūbylysymen körermenderdı taŋǧaldyrdy. Säken aǧamyzdyŋ bar ǧūmyry tuǧan jerınde öttı. Älemdık beineleu önerınıŋ talai tūlǧalaryn düniege äkelgen bügıngı Sankt-Peterburg qalasynda bılım alǧan. Onyŋ jūmystary özımızge ǧana emes, basqa elderge de jaqsy tanys. Közı tırısınde Mäskeu, Iаlta, Kiev, Sochi, Almaty sekıldı şaharlarda körmesı öttı. Ǧūmarovtyŋ kartinalaryn suretşılık janrdaǧy eşqandai mektep, aǧymǧa syiǧyza almaisyz. Ol öz eŋbekterın abstraksiialyq ülgıde jazady. Onyŋ qazaq qalamgerlerı şyǧarmalaryndaǧy jäne halyq auyz ädebietındegı qūstar beinesın negızge ala otyryp salǧan «Aqqūs» toptamasyn erekşelep aituǧa bolady. Tüiındep aitqanda, jadyrap aqqan Jaiyq boiynan kelgen suretşılerdıŋ eŋbekterınen ötken ǧasyr men keleşek arasyndaǧy ruhani ündestık şeber örılgen.
