Qazaqstan halqy bırlıgı künı merekesıne orai Botanikalyq baqta alma aǧaştary otyrǧyzyldy.
Qazaqstan halqy Assambleiasynyŋ ūiymdastyruymen ötken şaraǧa Premer-ministr Asqar Mamin men elorda äkımı Baqyt Sūltanov qatysty. Jas köşetterdı otyrǧyzǧan etnomädeni ortalyqtardyŋ belsendılerı özderı ekken alma aǧaştarynyŋ tūsyna estelık retınde bırlestıktıŋ atyn jazyp qoidy.
Jalpy, şara barysynda Botanikalyq baqtyŋ Qabanbai batyr daŋǧyly jaǧyndaǧy kıreberıs qaqpasynyŋ aldyna Atyraudan äkelıngen 800 tüp alma aǧaşy otyrǧyzyldy. Onyŋ 700 tübı būrynnan belgılı sūryptar bolsa, qalǧan 100 tüp – jaŋa sūryp.
– Atyraudyŋ Mahambet audanyndaǧy «Agro önımderı» tälım-baǧynda almalardy budandastyru jürgızıledı. Sol jerde qystyŋ aiazyna da tötep beretın jaŋa sūrypty oilap şyǧardyq. Qyp-qyzyl bolyp ösetın būl almaǧa elordanyŋ suyǧy eş äser etpeitın bolady. Ony bız Elbasy men elordanyŋ qūrmetıne «Nūr-Sūltan» dep atadyq. Öitkenı Tūŋǧyş Prezidenttıŋ äkesınıŋ baǧban bolǧanyn bılesızder. Elbasy sūhbattarynyŋ bırınde bala künınde äkesıne kömektesıp, alma aǧaştaryn otyrǧyzǧanyn aitqan bolatyn, – deidı Atyrau qalasyndaǧy «Saraişyq» şarua qojalyǧynyŋ basşysy Tamila Rozmetova.
Onyŋ aituynşa, būl alma aǧaştary 2 jyldan keiın jemıs bere bastaidy. Osy jerdegı 1 gektar jerde 20 tonna alma ösedı dep josparlanuda.
