Halyqaralyq sybailas jemqorlyqqa qarsy küres künıne orai elordada «Täuelsız 30 jylda sybailas jemqorlyqpen küres qyzmetınıŋ jetıstıgı» atty forum öttı. Is-şaraǧa qalalyq äkımdık qyzmetkerlerı, audan äkımderı, Sybailas jemqorlyqpen küres ıs-qimyl agenttıgı departamentı men qoǧamdyq ūiym ökılderı qatysty.
Forumdy qūttyqtau sözımen qala äkımınıŋ orynbasary Ermek Qizatov aşty.
– Halyqaralyq sybailas jemqorlyqqa qarsy küres künı qarsaŋynda täuelsızdık jyldaryndaǧy qol jetken jetıstıkterge arnalyp ötkızılıp otyrǧan būl forumnyŋ özındık mänı zor. Osy jyldarda elordada da jeŋ ūşynan jalǧasudy joiu, sybailastyqqa tözımsızdıktı qalyptastyru maqsatynda azamattyq qoǧam ökılderımen bırlese otyryp keşendı ıs-şaralar atqaryldy. Būl är adamnyŋ boiynda mūndai keleŋsızdıkterge jol bermeu, jauapkerşılıktı arttyru sezımın tärbieleuge mümkındık berdı, – dedı E.Qizatov.
Sondai-aq ol sybailas jemqorlyqqa qarsy kürestı jetıldırude bırqatar auqymdy ıs-şaralardyŋ da jospary jasalǧanyn atap körsettı. «Bügıngı taŋda Sybailas jemqorlyqqa qarsy küres ıs-qimyl departamentı azamattyq sektormen ǧana emes, memlekettık mekemelermen de aitarlyqtai jūmystar jürgızıp keledı. Osyǧan bailanysty qala äkımdıgı de sybailas jemqorlyqqa qarsy küres saiasatyn öz ökılettıgı şeŋberınde jüielı türde jüzege asyruda» dedı elorda äkımınıŋ orynbasary.
Qoǧam qairatkerı, «Jaŋaru» RQB töraǧasy Oralbai Äbdıkärımov el ömırınde sybailas jemqorlyqpen küreste oŋ nätije bar ekenıne toqtaldy. «Qazaqstan Prezidentı Qasym-Jomart Toqaevtyŋ özı sybailas jemqorlyqpen küres bızdıŋ aldymyzda tūrǧan eŋ basty mındetterdıŋ bırı dep atap körsetken edı. Qazır osy negızde qataŋ talaptar belgılenıp, jaŋa baǧyttarǧa jol aşyldy. Sybailas jemqorlyqqa qarsy küres vedomstvosy būryn bolmaǧan tyŋ ūstanymdardy engızıp, kelelı jūmys täsılıne köşude. Būl baǧytta endı ıs-qimyl jüielı ärı keşendı türde jüzege asyrylady dep senımdı aituǧa bolady. Osy tūrǧyda bas qala basqa aimaqqa ülgı boluy qajet» dedı Oralbai Äbdıkärımov.
Al elordalyq mäslihat hatşysy Erlan Kanalimov är adamnyŋ boiynda sybailas jemqorlyqqa qarsy mädeniet qalyptastyru üşın azamattyq qoǧam ökılderınıŋ belsene atsalysqany maŋyzdy ekenın atap öttı. «Sybailas jemqorlyq keleşek ūrpaqtyŋ tamyryna balta şabady. Süttei ūiyp otyrǧan yntymaǧymyz ben bırlıgımızdı şaiqaltady, qoǧam damuyn aitarlyqtai tejep, saiasi tūraqtylyǧymyzǧa qauıp töndıredı. Sondyqtan ony tübırımen joiu üşın küş bırıktıre otyryp, naqty jūmys ısteuımız kerek. Elordalyq mäslihat deputattary aşyqtyq ūstanymymen jūmys ısteude. Sessiialarymyz aşyq jürgızıledı. Barlyq deputattyŋ telefony qoljetımdı» dedı E.Kanalimov.
Spikerlerdıŋ sözderınen keiın forumǧa qatysuşylar sybailas jemqorlyqqa qarsy saiasatta qūndylyqty baǧalau, är adamdyŋ boiynda mūndai keleŋsızdıkke qarsy tözımsızdık deŋgeiın köteru mäselelerın talqylady.
