Dostyq üiınde 9 jeltoqsan – Halyqaralyq sybailas jemqorlyqqa qarsy küres künı qarsaŋynda «Sybailas jemqorlyqqa qarsy küres mäselelerındegı ÜEŪ-nyŋ rölı» atty forum öttı. Jiyn soŋynan jemqorlyqqa qarsy mädeniettı qalyptastyruǧa yqpal etetın eŋ üzdık jurnalistık şyǧarmalar baiqauynyŋ jeŋımpazdaryn marapattau räsımı boldy.
Forumda söz söilegen Sybailas jemqorlyqqa qarsy küres jönındegı agenttıktıŋ Nūr-Sūltan qalasyndaǧy departamentı basşysynyŋ orynbasary İlias Bazilov jemqorlyqqa tözbeuşılık pen qūqyqtyq sauattylyqty qalyptastyruǧa baǧyttalǧan Antikor live, Adal komek, «Adal ūrpaq», «Sanaly ūrpaq» siiaqty jobalardyŋ ömırşeŋdıgın atap öttı. Būl baǧyttaǧy «Adaldyq alaŋy» jobalyq keŋsesınıŋ atqarǧan jūmysyna da oŋ baǧa berıldı.
«iQala qalalyq qyzmetter ortalyǧy jäne iKomek qalalyq jedel äreket etu ortalyǧymen bırlese otyryp, memlekettık organdardyŋ jūmysyndaǧy jemqorlyq täuekelderdı joiu jäne aşyqtyqty qamtamasyz etu boiynşa ıs-şaralar qabyldanuda. Būdan bölek, halyqqa qūqyqtyq kömek körsetıledı. 2021 jyldyŋ 9 aiynda iQala men iKomek mamandary 2,3 mln ötınış pen şaǧymdy qarap, sonyŋ ışınde 253 myŋ özektı mäselenıŋ şeşuıne atsalysty. 150 myŋnan asa memlekettık qyzmet körsetıldı» dedı İ.Bazilov.
Forumnyŋ ekınşı bölıgınde bas qalada sybailas jemqorlyqqa qarsy saiasatty ıske asyruǧa eleulı üles qosyp jürgen memlekettık organdar men ükımettık emes ūiymdardyŋ ökılderın, jekelegen belsendı azamattardy, sondai-aq BAQ ökılderı arasyndaǧy sybailas jemqorlyqqa qarsy mädeniettı qalyptastyruǧa yqpal etken üzdık jurnalistık şyǧarmalar baiqauynyŋ jeŋımpazdaryn marapattau räsımı öttı. Şyǧarmaşylyq baiqauǧa 2021 jyldyŋ 1 qaŋtary men 1 qaraşasy aralyǧynda osy taqyrypqa maqala, sūhbat jazǧan, arnaiy reportaj, baǧdarlama jäne derektı filmder tüsırgen jurnalister qatysty. Baiqauǧa kelıp tüsken jūmystardy Sybailas jemqorlyqqa qarsy küres jönındegı agenttıktıŋ Nūr-Sūltan qalasyndaǧy departamentı, ükımettık emes ūiymdar, BAQ ökılderınen qūrylǧan arnaiy komissiia müşelerı qarap, bırneşe atalym boiynşa üzdıkterdı anyqtady.
Üş atalym boiynşa jeŋımpazdarǧa 250000 teŋge kölemındegı aqşalai sertifikat jäne diplom tapsyryldy. «Üzdık reportaj» atalymynda «Qazaqstan» ŪTRK-nyŋ ökılı Daryn Saǧitov, «Aqparattyq portaldardaǧy üzdık jariialanym» atalymynda «bag.kz» portalynyŋ tılşısı Güljan Ramanqūlova, al «Baspa basylymdardaǧy üzdık saraptamalyq material» atalymynda «Astana aqshamy» gazetınıŋ şef-redaktory Tölen Tıleubai jeŋımpaz atandy. Sondai-aq tūrmystyq tehnika satyp aluǧa arnalǧan 50000 teŋgelık yntalandyru syilyǧy «Aiqyn» gazetınıŋ tılşısı Jadyra Müsılımge, «Habar» telearnasynyŋ tılşısı Timur Qazaǧūlovqa jäne «Aiqyn» gazetı saitynyŋ ökılı Abylaihan Jūmaşevke berıldı.
