Prezident Qasym-Jomart Toqaev Sybailas jemqorlyqqa qarsy ıs-qimyl agenttıgınıŋ basşylyq qūramymen beinebailanys arqyly keŋes ötkızıp, jaŋadan taǧaiyndalǧan töraǧa Ashat Jūmaǧalidy tanystyrdy. Prezident agenttıktıŋ būrynǧy töraǧasy Oljas Bektenovke atqarǧan jūmysy üşın rizaşylyǧyn bıldırıp, onyŋ jaŋa qyzmetıne tabys tıledı.
Memleket basşysy agenttıktıŋ jaŋa basşylyǧy men jeke qūramyna aldaǧy kezeŋge arnalǧan bırqatar mındet jüktedı. Prezidenttıŋ aituynşa, Sybailas jemqorlyqqa qarsy saiasattyŋ 2022-2026 jyldarǧa arnalǧan tūjyrymdamasynda körsetılgen ıs-şaralardy tolyq jüzege asyru kerek. Joǧary lauazymdy şeneunıkter arasyndaǧy, äsırese, halqymyzdyŋ äl-auqatyna tıkelei äser etetın salalardaǧy jemqorlyqty anyqtau jäne onyŋ jolyn kesu jönındegı qataŋ täsıldı jalǧastyrǧan jön. Prezident jemqorlyqqa itermeleitın jüielı sebepter men jaǧdailardy joiu maŋyzdy ekenıne nazar audardy. Onyŋ aituynşa, aqparattyq-tüsındıru jūmystaryn tiıstı deŋgeide jürgızu kerek.
Memleket basşysynyŋ aituynşa, tergeu jūmystarynyŋ nätijesınde agenttık qūny 108 milliard teŋge kölemındegı şyǧyndy qaitara aldy. Būl – oŋ nätije. Bıraq, sonymen qatar, būl ötken kezeŋderde jemqorlyq qanşalyqty beleŋ alǧanyn körsetedı.
«Jemqorlyqtyŋ barlyq türımen ymyrasyz küres – memleketımızdıŋ odan ärı damuynyŋ basymdyǧy. Paraqorlyq, tamyr-tanystyq, qoŋyrau şalu arqyly mäsele şeşu jäne taǧy basqa keleŋsızdıkter jyldar boiy azamattardyŋ memlekettık instituttarǧa degen senımıne selkeu tüsırgenın bılesızder. Osy oraida halyqtyŋ ädıldıkke degen ümıtı azaia bastady. Sondyqtan menıŋ sailau aldynda bergen uädelerımnıŋ bırı jemqorlyqty tübırımen joiǧanşa ymyrasyz küres jürgızu boldy. Būl ıste Sybailas jemqorlyqqa qarsy ıs-qimyl agenttıgı şeşuşı röl atqarady. 2019 jyly mausymda qūrylǧan sätten berı atalǧan organ köptegen jūmys atqardy. Ony moiyndau kerek. Jemqorlyqqa qarsy küres şaralarynyŋ jüiesı belsendı dami bastady. Atap aitqanda, jaŋa qūqyqtyq instituttar, özıne baǧynyşty qyzmetkerlerdıŋ jemqorlyq qylmysy üşın saiasi jäne memlekettık tūlǧalardyŋ qyzmetten ketuı, adaldyqqa tekserıs, normativtık-qūqyqtyq aktılerge jemqorlyqqa qarsy jürgızıletın saraptama jäne taǧy da basqa bastamalar osy sanatqa kıredı. Olardyŋ alǧaşqy nätijelerın körıp otyrmyz» dedı Qasym-Jomart Toqaev.
