Qazaqstan Premer-ligasynyŋ 29-turynda «Astana» futbol kluby syrt alaŋda qostanailyq «Tobyl» komandasymen kezdesıp, nätijesınde 1:1 esebımen teŋ tarqasty.
Europa ligasynyŋ 2-turynda chehiialyq
«Slaviia» klubymen kezdeskennen keiın elordalyq komandanyŋ bas bapkerı Stanimir Stoilov būl joly bıraz oiynşylaryn demaldyrudy jön sanapty. Negızgı qūramnyŋ tolyq bolmauy bırden syr berdı. Aldymen eseptı 33-minutta qostanailyqtar aşty. Būryştamadan berılgen dopty qonaqtardyŋ qaqpasyna Jasūlan Moldaqaraev jaiǧastyrdy.
Alaida alaŋ ielerın alǧa tartqan būl esep köpke saqtalmady. Araǧa nebärı segız minut salyp «Astana» qorǧauşysy Dmitrii Şomko özınıŋ mänerınde sol qaptaldan boilai enıp, «Tobyldyŋ» toryn top etkızdı. Ol osy golymen kezınde Chempiondar ligasynda «HİK» qaqpasyna salǧan tamaşa golyn kezdeisoqtyq emes ekenın taǧy bır däleldegendei boldy. Bırınşı taimdaǧy osy esep oiyn soŋyna deiın özgerıssız qaldy.
Osylaişa, «Astananyŋ» QPL-daǧy 11 matchtyq jeŋıstı seriiasy toqtady. Komanda 67 ūpaimen turnir kestesınde ekınşı orynda keledı. Onyŋ aldyna şyǧyp tūrǧan «Qairat» komandasy da qonaqta «Ertıspen» teŋ oinap, ūpai bölıstı. Basty qarsylasynan ekı-aq ūpai qalyp tūrǧan elordalyq komandanyŋ qosymşa üş oiyny baryn eskersek, almatylyqtardy alda dep aituǧa älı erte.
Orynbek ÖTEMŪRAT
