Qalamyzda jerasty joldary asa köp emes. «Şapaǧat» kommunaldy bazary men «Älem» bazary arasyn qosatyn, Kenesary köşesınen Kongress-Holǧa ötetın, Respublika daŋǧylyndaǧy jäne «Han Şatyr» aldyndaǧy jerasty joldary bar. Köbımız kündelıktı ötıp jürgen ötkelder bolǧan soŋ onyŋ qolailylyǧy men qauıpsızdıgı qandai deŋgeiınde ekendıgın bılmek bolyp jolǧa şyqtyq.
Soŋǧy jyldary aşylǧan «Han Şatyr» aldyndaǧy jerasty joly – eŋ qolaily ötkel dep aituǧa bolady. Halyqtyŋ eŋ köp baratyn ärı qala qonaqtarynyŋ da bas tırep keletın jerı. Jerasty jolynan mın tappadyq. Degenmen, aldaǧy uaqytta ony bas qalamyzdyŋ kelbetı men astanalyqtardyŋ da tynys-tırlıgın bıldıretındei körkem bezendıruge män bergen jön siiaqty. Būl jerde turisterge arnalǧan aqparattyq nysandar ornatylsa da artyq emes.
Jerasty joldarynyŋ bärı jaily ärı qauıpsız emes deuge bolady. Tar pışılgen Respublika daŋǧylynyŋ basyndaǧy jäne Kenesary köşesındegı jerasty joldary osy sanatqa kıredı. Odan ötu üşın kölbeilep emes, qūldilap tüsetınıŋız azdai, satylarynyŋ enı tar sebeptı, qiǧaştap adymdamasaŋyz, syrǧanap ketuıŋız äbden mümkın.
Al Kongress-Holl tübındegı jerasty ötkelınıŋ tazalyǧynda eş mın joq, kündız-tünı şamdary janyp, jarqyrap tūrady. Būl jer köşe mädenietınıŋ belsendı ökılderı – jastarǧa da ūnaityn siiaqty. Mūnda äuesqoi önerpazdardyŋ gitara tartyp, sazdy aspaptarda oinap, özderın de, önerın de körsetıp tūrǧanyn jiı baiqaimyz.
Ülken konsert soŋǧy kezderı jer astynda emes, Kongress-Holdyŋ alaŋynda ötıp jür. Astana qalasy Memlekettık akademiialyq filarmoniiasy muzykanttarynyŋ aşyq aspan astynda öner körsetıp, halyq aldyna şyǧuy qūptarlyq bastama şyǧar. Bıraq, ädemı äuendı aǧylyp jatqan kölıkterdıŋ şuy tūnşyqtyrǧan konsertte ne män bar?! Akademiialyq ärtısterdıŋ önerın tym qoraş etıp, jerasty joldaryndaǧy köşe muzykanttarymen teŋestırgendei äser qaldyrady eken. Odan qaldy, önerdıŋ bäsın tym tömendetıp jıbergen joqpyz ba?!
Degenmen, önerpazdardyŋ denı «Şapaǧat» bazarynyŋ jerasty jolynda eken. Osynda Säduaqas, Dima esımdı baianşy jıgıtterdı kezdestırdık. Olar künıne bır myŋnan bes myŋ aralyǧynda tabys tauyp tūratynyn jasyrmady. Tıptı, önerpazdardyŋ janyna üiırılıp, «qazaqtyŋ bır änın aitşy» dep ötınış aitatyndar da joq emes. Ondaida Säduaqas garmonyn aŋyratyp jıberıp, qazaqtyŋ änderıne basady. Al, orys klassikterın tyŋdaǧyŋyz kelse, Dima garmonyn qolǧa alady. Ol – äuesqoi änşı. Muzykalyq bılımı joq. Jas örennıŋ jol boiynda än salyp nan tapqysy kelse, ol da öz taŋdauy dep ärı qarai jyljydyq.
Osy joldyŋ ötkelınde örıktıŋ süiegın üiırıp otyrǧan «qūmalaqşylardy» da, qazaqtyŋ ūlttyq kiımın kiıp alyp, dombyrasyn qūşaqtaǧan «ärtıs äieldı» de kezdestırdık.
Ersılı-qarsyly ötıp jatqan jūrt «ūlttyq kiımdı kiıp alyp, qol jaiatyndai ne basyna kün tudy?» degendei qabaq tanytatyn syŋaily. Men de solai oiladym. Alaida aitysyp abyroi tappasymdy bılıp, jerdıŋ betıne jetuge asyqtym.
Baiqaǧanymyz, jerasty jolynda da kün körıp jürgender jeterlık eken. Keibıreudıŋ ömır süru ürdısı solai qalyptasqandyqtan, ony joqqa şyǧara almaisyz. Kütımı kem «Şapaǧattyŋ» jerasty jolynyŋ qos jaqtauyn qaptap, şamyn jaǧyp jarqyratyp qoisa, būl körınıster közımızge ersı körınıp, al ötkelden ötu köbımızge qorqynyşty bolmas edı…
Aigül UAISOVA
