Nūr-Sūltan qalasynyŋ Saryarqa audanynda «Halyq qatysatyn biudjet-2022» jobasynyŋ törtınşı kezeŋı bastaldy. Aldaǧy 30 kün boiy audan tūrǧyndary abattandyru üşın ūsynǧan aulalardyŋ ışınen özderıne ūnaǧan josparǧa dauys bere alady.
Jobalyq ūsynystar 10 nauryzǧa deiın qabyldandy. Qūjattardy qabyldau bastalǧannan berı 71 ötınım berıldı, onyŋ ışınde 44 ūsynysty saraptamalyq keŋes dauys beru kezeŋıne ötkızdı.
Atalǧan joba aiasynda biyl 23 aulany abattandyru közdelgen. Dauys beru ekı sanatqa bölındı: päterler sany 100-den aspaityn 10 aula jäne päterler sany 100-den asatyn 13 aula taŋdalynady.
Aula josparyna dauys beru üşın azamattar Saryarqa audany äkımı apparatynyŋ saityna ESQ arqyly kırıp, «Paidaly sıltemeler» bölımınde «Halyq qatysatyn biudjet» qosymşa betıne basyp, jürekterı qalaǧan jobaǧa dauys beruıne bolady. Dauys tek bır jobaǧa ǧana berıletının eskergen jön. Jeŋımpaz jobalar tamyz aiynyŋ soŋyna deiın jüzege asady. Al audannyŋ özge aulalary qarjylandyru bölıngen jaǧdaida abattandyrylatyn bolady.
2020 jyldan bastap respublikalyq, oblystyq maŋyzy bar qalalarda jäne astanada «Halyq qatysatyn biudjet» jobasy qanatyn qaqqan. Ony engızudıŋ maqsaty – jergılıktı atqaruşy organdardyŋ ony qalyptastyru aiasynda jergılıktı biudjet qarajatyn bölu kezınde halyqtyŋ auqymdy şoǧyry qatysuyn qamtamasyz etu, – deidı QR Qarjy ministrlıgı.
Sonymen qatar Memleket basşysy Q.Toqaev ötken jylǧy Qazaqstan halqyna Joldauynda atalmyş joba tabysty engızılgenın aitqan. Jobany jaqsy täjıribe dep baǧalap, endıgıde abattandyru jäne tūrǧyn-üi kommunaldyq şaruaşylyǧynyŋ biudjetındegı «halyq qatysatyn» ülestı 10 esege arttyru qajet degen tapsyrma bergenın būqara jaqsy bıledı.
Joba bastalǧan jyly Saryarqa audanynda 68 ötınım berılıp, onyŋ 40 jobasy saraptamalyq keŋes üstelıne tüsken. Aşyq dauys beru nätijesınde 13 joba jüzege asqan. Ötken jyly 10 jobaǧa jan bıtken.
Baian ASYLBEKOVA
