Erkeǧali Rahmadiev atyndaǧy memlekettık akademiialyq filarmoniianyŋ «Halyq änı» bölımı Qaz KSR Halyq ärtısı, Qaz KSR Memlekettık syilyǧynyŋ laureaty Jüsıpbek Elebekovtıŋ 120 jyldyǧyna arnalǧan «Än erkesı» konsertın ūsyndy.
Qazaq än önerınıŋ örleuıne, sonyŋ ışınde halyq änderı men halyq kompozitorlary änderınıŋ saqtalyp, zamannan zamanǧa jetuıne Jüsıpbek Elebekovtıŋ qosqan ülesı ūşan-teŋız. Än älıppesın äkesınıŋ ınısı Jaqypbek Balǧabaiūlynan üirenıp, keiınnen Ämıre Qaşaubaev, Ǧabbas Aitbaev, Qali Baijanov salǧan änderdı tyŋdap, önerın şyŋdady. Bozbala şaǧynda Semeidegı «Es-Aimaq» üiırmesınde än salyp, osy truppanyŋ konsertterı men spektaklderıne qatysudan öner jolyn bastaǧan änşı Qazaq memlekettık drama teatrynda, Qazaq memlekettık filarmoniiasynda, «Qazaqkonsert» bırlestıgınde qyzmet ıstedı. Abai atyndaǧy opera jäne balet teatrynyŋ «Qyz Jıbek», «Aiman-Şolpan» spektaklderınde operalyq partiialardy oryndady. Ekınşı düniejüzılık soǧys jyldary konserttık brigadanyŋ qūramynda maidan dalasyn aralap, jauyngerlerdıŋ ruhyn köterdı. 1967 jyldan 10 jyldai qazır kolledjge ainalyp, özınıŋ atymen atalatyn estrada-sirk studiiasynda şäkırt tärbieledı.
Mädeniet Eşekeev, Jänıbek Kärmenov, Qairat Baibosynov, Kenjeǧaly Täşkenov, Mūratbek Jünısbekov, Sanaq Äbeuov, Tūrsynǧazy Rahimov, Keldenbai Ölmesekov, Jūmabek Qambarov, Amangeldı Jıkenov, Ǧalym Mūhamedin – būl Jüsıpbek Elebekovtıŋ bır top şäkırtterı, ūstaz ısın jalǧastyruşylar. Jüsıpbek Elebekov qazaq änderınıŋ ışındegı talai jauhar tuyndylardy şäkırtterıne üiretıp, än köşı zamannan zamanǧa jetıp otyr.
Jüsıpbek Elebekov «Es-Aimaqta» ūly Abaidyŋ auzynan änderın alyp qalǧan Älmaǧambet änşıden Abai änderın üirendı. Repertuarynda halyq änderı, Bırjan sal, Aqan serı, Baluan Şolaq, Mädi Bäpiūly, Estai Berkımbaiūly, Jaiau Mūsa, İmanjüsıp Qūtpanūly, basqa da halyq kompozitorlarynyŋ änderı boldy.
Konsertte sol änderdıŋ bırazyn körermender Qazaqstannyŋ eŋbek sıŋırgen qairatkerı Gülmira Sarina, Mädeniet salasynyŋ üzdıkterı Nūrai Tanabaev, Berık Omarov, Telman Nürkenov, Daniiar Mūqan, Äigerım Nartüie, halyqaralyq jäne respublikalyq baiqaulardyŋ laureattary Özgerıs Şerıkbai, Jaqsykeldı Maiasarov, Nūrjan Meiırhan, Rahat Begasylov, Alua Qalymbekova, Aidos Oŋǧarbai syndy änşılerdıŋ oryndauynda tyŋdady. Konsert barysynda «Qorqyt» etnoansamblı öner körsettı.
