Täuelsızdık taŋy atqaly märtebelı mınberden elge arnalyp talai Joldau aityldy. Joldaudan keiın ıle-şala qolǧa alynǧan ırgelı jobalar da, şala-pūla küieleş küiınde jörgegınde tūnşyqqan bastamalar da barşylyq edı. Özderı aldymen tüisınıp-tüsınbei tūryp, el aralap, Joldaudy jalaulata jarnamalap, tüsındıru jūmystaryn jürgızetın toptan da jūrtşylyq jalyǧa bastaǧan bolatyn. Degenmen barşa dünie jaŋaryp, jaŋǧyratyn biylǧy nauryz aiynda jūrtşylyq Aqorda jaqqa alaŋdap, jyl qūsy keletındei jaŋalyq kütkenı jasyryn emes. Qaŋtar yzǧarynan soŋ altyn kürektei jylylyq, jyly lep kütkenı aqiqat. Qoǧam bır özgerıs, sılkınıs kütken edı, oryndala ma sol ümıt?
Memleket basşysy būl Joldauda Jaŋa Qazaqstandy jaŋaru men jaŋǧyru jolyna bastaityn qaǧidattaryn halqyna baiandapty. Qasym-Jomart Toqaev sözdı «Bügıngı Joldaudyŋ män-maŋyzy airyqşa. Onyŋ arqalaityn jügı bır jylmen şektelmeidı, auqymy keŋ, mazmūny da bölek. Bız aldymyzǧa biık maqsattar qoiyp otyrmyz. Özderıŋızben bırge Jaŋa Qazaqstandy qūruǧa kırıstık» dep bastapty. Tekke tamsanyp, süisıne bermei, endı bızge oi salǧan bastamalarǧa az-kem toqtalaiyq.
Audan, qala, oblys äkımderı bırazdan berı jergılıktı mäslihat deputattary kelısımınen keiın ǧana taǧaiyndalyp jür. Osynyŋ özın demokratiiaşyl qadamǧa baladyq. Jasyratyn nesı bar, elımızdegı bırde-bır mäslihat ūsynylǧan ümıtkerge qarsylyq bıldırgen emes. Tıptı taŋdau joq. Sebebı jalǧyz ǧana ümıtker ūsynylady. Endı sol ümıtker ekeuden kem bolmaidy. Iаǧni taŋdau, baǧalau mümkındıgı tuyp otyr.
Jergılıktı äkımder bilık partiiasyn da qosa basqaratyn. Al mäslihat deputattarynyŋ 90 paiyzdan astamy sol partiia ökılı. Sondyqtan halyq ökılı bolsa da, kemşılıgın körıp-bılıp otyrsa da, öz basşysyn synai almai, auzyna su toltyryp alǧandai küi keşetın. Artyq-auys äŋgıme aitsa, partiialyq tızımnen syzylady, sosyn deputattyq mandattan da aiyrylady. Bilıkke kelgen partiia osy sebepten jergılıktı äkımder jūmysyna ädıl baǧa bere almaidy, dūrys jön sıltei almaidy, özara syndy örıstetpeidı, mūnyŋ özı qoǧamdy daǧdarysqa äkelıp tıredı. Jūrtşylyqtyŋ bilıkke, bilık partiiasyna degen senımı setınedı.
Partiialyq tızımmen deputat mandatyn ielengenderdıŋ köpşılıgı äkım men jergılıktı partiia kösemderınıŋ «öz adamdary», «kerek kısıler», «qaltalylar» ekenın jūrtşylyq jaqsy bıledı. «Bötender» men «özge pıkırge» mūnda jol joq. Sondyqtan da halyq bilıgınıŋ mınberı – jergılıktı mäslihattardan bastalǧan toqyrau bükıl eldı şarpydy. Endı bärı özgeredı. Äkım qaralar partiia töraǧasy bola almaidy, audan, qala mäslihattary sailauy majoritarlyq jüiege köşedı, oblystyq deŋgeide de aralas jüie engızıledı. Tırkeu jeŋıldegen soŋ türlı partiia, qozǧalystarǧa da endı jan bıtedı. Bügınge deiın jergılıktı äkım atqaruşy bilıktı de, ökıldı bilıktı de öz uysynda ūstap otyrsa, endı olai bolmaidy. Qasym-Jomart Toqaevtyŋ bastamasymen endı ol ökıldı bilıktı halyq ökılderıne qaitarady. Ärı bi, ärı qoja degen bolmaidy endı. «Äkım bolsaŋ, halqyŋa jaqyn bol!» degen naqyldy jergılıktı basşylar jyl saiynǧy dästürlı, bırsarynda ötetın, ssenariiı taptauryn bolǧan syrǧytpa esep beru jinalysynda baiandamasyna tamyzyq etıp qosyp qana qoimai, ömırde de ıske asyruyna tura keledı. Sebebı onyŋ jūmysyna tūrǧyndar atynan bäsekelestık negızde halyq tıkelei sailaǧan deputattar baqylau ornatady.
«Qaǧaz betınde ǧana jüzege asyrylǧan, bıraq şyndyqqa eş janaspaityn jalǧan tabystarǧa masattanyp otyratyn zaman kelmeske kettı. Halyqqa köpırme söz, bos uäde emes, közben körıp, qolmen ūstauǧa bolatyn oŋ özgerıster kerek» deidı Memleket basşysy osy Joldauda.
Halyq köbıne öz öŋır, audan, auyldaǧy bilık buyndaryndaǧy keleŋsızdıkke, ädıletsızdıkke qarap jalpy saiasi jüiege, tūtas bilıkke baǧa beredı. Jaŋa Joldaudaǧy baǧaly bastamalar tezırek el ışındegı oŋ özgerısterge negız qalasa alǧa qarai qadam basarymyz sözsız…
Erkın QYDYR,
Qazaqstannyŋ eŋbek sıŋırgen qairatkerı
