Ekı qolǧa bır kürek ızdegen jastar 9 şılde künı «Kongress-holl» saraiyna jinaldy. Astana qalasy äkımdıgınıŋ qoldauymen ūiymdastyrylǧan bos jūmys oryndar järmeŋkesıne 150-den asa kompaniia qatysty.
«Jūmyssyz jürgen elordalyqtardyŋ üşten bırı – 20 men 29 jas aralyǧyndaǧylar. Bügın olarǧa zor mümkındık berıldı. Būl kompaniialar 500-dei bos jūmys ornyn ūsynyp jatyr. Şet tılı pänınıŋ mūǧalımı, injener, qyzmet körsetu salasynyŋ mamandyqtary ülken sūranysqa ie» deidı «Astana jastary» kommunaldyq mekemesınıŋ bölım basşysy Aida Sanat.
«BI-group» kompaniiasynyŋ ökılı Nazgül Sütemgenovanyŋ aituynşa, jūmys sūrap baratyn jastardyŋ jartysynan köbı – säulet-qūrylys fakultetınıŋ tülekterı. «Äsırese, L.Gumilev atyndaǧy Euraziia ūlttyq universitetın bıtıruşıler bızge jiı keledı. Bızdıŋ kompaniia – ırı investisiialyq holding jäne Qazaqstannyŋ jyljymaityn mülık naryǧyndaǧy tanymal köşbasşy bolǧandyqtan, būl talpynystaryn jaqsy tüsınemız. Taŋnan berı 2-3 saǧat ışınde 100-den asa jas öz tüiındemelerın tastap kettı» deidı kompaniia mamany. Şynynda da, basqa üstelderge qaraǧanda, osy käsıporynnyŋ töŋıregın jaǧalauşylar köp. Solardyŋ bırı – Dastan Talǧatūly. Ol Euraziia ūlttyq universitetınıŋ aqparattyq tehnologiialar fakultetın biyl bıtırıptı. Būǧan deiın «Qazaqstan temır joly», Syrtqy ıster ministrlıgınde öndırıstık täjıribeden ötken eken. Bügıngı järmeŋkeden özı qalaǧan qyzmet türın tabuǧa ümıttı.
Kölık mehanigı, jürgızuşı siiaqty jūmystar da – tapşy mamandyqtar qatarynda.
№4 avtobus parkınen kelıp otyrǧan Gülmira Nūrǧalina osyny aitty. «Qala ışınde qatynaityn avtobustar men mektep avtobustarynyŋ jürgızuşısı, elektrik, tegısteuşı, medbikeler kerek qazır bızge. Bılıktılıktı arttyru kurstarynda tegın oqytamyz. Ailyq jalaqylary 100 myŋ teŋgeden joǧary» deidı ol.
Botaköz MARATQYZY
