Jūqpaly aurudan saqtanuǧa şaqyrdy
Keşe būqaralyq aqparat qūraldary ökılderı qalalyq balalar jūqpaly aurular auruhanasynda bolyp, medisinalyq mekemenıŋ därıgerlerımen kezdesıp, onyŋ qyzmetımen tanysty. Būl – barlyq zamanaui standarttarǧa sai jaŋaşa jabdyqtalǧan, osy sala boiynşa qaladaǧy jalǧyz 300 oryndyq emdeu orny. Mūnda joǧary bılıktı mamandar jūqpaly auruǧa şaldyqqan 15 jasqa deiıngı balalar men jasöspırımderge mamandandyrylǧan medisinalyq kömek körsetedı.
Mekeme qyzmetkerlerı aurulardyŋ qabyldau-diagnostikalau bölımıne kelıp tüskennen bastap, nauqastar dertınıŋ auyrlyǧyna qarai arnauly oryndarda jeke qaralyp, emdeudıŋ erekşe şaralaryn alady. Auruhana bas därıgerınıŋ sapany baqylau boiynşa orynbasary Roza Ötegenova bügınde täulıgıne 200-ge deiın balalar qaralatynyn aitty.
Orta eseppen alǧanda būl nauqastardyŋ jaǧdaiyna qarai üşten bır bölıgı jatqyzylady. Osy kezeŋde mezgıldık jedel respiratorlyq virusty jūqpanyŋ köterılıp tūrǧany belgılı. Virus jūqqan balanyŋ qyzuy köterılıp, ışı ötıp ne qūsyp, keide dene qyzuyn kötere almai, talyqsyp jatady. Mūndaida şūǧyl kömek körsetıledı. Negızı, üş jasqa deiıngı balalar anasymen jatqyzylady, eger närestesı emızulı bolsa, onda anasy tegın tamaqpen qamtamasyz etıledı. Al üş jastan keiıngı säbilerdıŋ analaryna künıne ekı ret kelıp balasynyŋ janynda boluǧa mümkındık qarastyrylǧan. Bır auysymda üş därıger qyzmet etedı, nauqastardyŋ sanynyŋ köbeiuıne bailanysty 2 därıger taǧy qosylady.
Därıgerler ata-analarǧa balalarynyŋ jai-küiıne den qoiyp, qandai da bır aurudyŋ türı baiqalsa, aldymen därıgerlerdıŋ keŋesıne jügınıp, alǧaşqy sätten dūrys em-şara qoldanyp, aurudyŋ aldyn alu kerektıgın eskerttı.