Halyq qalaulylary kanikulǧa şyqsa da, el ışınde jür. Būrnaǧy künı Parlament Mäjılısınıŋ deputaty, jazuşy Aldan Smaiyl «Astana aqşamy» gazetınıŋ redaksiiasyna kelıp, jurnalistermen pıkırlestı.
«Astana aqşamy» – aşyluyna özımız ūiytqy bolǧan qara şaŋyraq qoi. Öitkenı, būryn qalalyq qazaq gazet bolǧan joq būl öŋırde. Respublikadaǧy alǧaşqy qazaq qoǧamdyq ūiymy – «Tıl jäne mädeniettı» qūrǧanda tūŋǧyş qozǧaǧan mäselelerımızdıŋ bırı qazaq gazetı men teatryn aşu edı» – dei kelıp,
Aldan Smaiyl basqosuda deputattardyŋ qyzmetın, jūmysyn keŋınen söz ettı.
– Şyndyǧynda, deputattyŋ jūmysyn köpşılık bıle bermeidı, atqaruşy bilıktıŋ tarmaǧy dep tüsınedı. Sodan keiın de olarǧa tän emes talaptar qoiyp jatady halyq. Oryndalmasa, renış bıldıredı, – dedı. Halyq qalaulysynyŋ aituynşa, Parlament jäne onyŋ deputattarynyŋ qyzmetı – saiasi, qūqyqtyq-şyǧarmaşylyq qyzmet. «Saiasi degenım, deputat saiasi mäselege aralaspai qoimaidy. Öitkenı, ärbır zaŋ – memlekettıŋ saiasaty. Qūqyqtyq deitınım – sol
saiasatty, memlekettıŋ bilıgın zaŋǧa ainaldyru. Şyǧarmaşylyq deitınım – sol zaŋdy talqylaityn, jetıldıretın, qajet bolsa, joq zaŋdy jazatyn deputattar. Būl prosester aituǧa ǧana jeŋıl. Mysaly, bızge köp zaŋ jobasy Ükımet arqyly kelıp tüsedı, sony Mäjılıstıŋ talqylauynan keiın qarasaŋyz, tanu qiyn, myŋdaǧan özgerıs enıp jatady. Keibır zaŋ jobalary ikemge kelmei, qaitarylyp jıberıledı» – dedı ol.
«Bız demokratiialyq elmız» dep auzyna kelgenın bylapyttaityndar aramyzda joq emes. Aldan Smaiyldyŋ pıkırınşe, sol demokratiia degendı jeleuletıp, kez kelgen memlekettı dästürımen, saltymen, tılımen joǧaltyp, oirandauǧa bolady eken. Al şyn demokratiia degen ne? Mūnyŋ naqty anyqtamasy älı künge deiın joq, ärkım ärtürlı aitady. «Sonyŋ ışınde, – dedı deputat, – ejelgı grek filosoftarynyŋ aitqany dūrys: «Demokratiia degenımız – belgılı bır kezeŋde belgılı bır elge qajettı saiasat» – deidı olar. Mysaly, qazırgı Qazaqstanǧa qandai saiasat kerek, sol – halyq üşın demokratiia. Är el özınıŋ dınıne, tılıne, dılıne, ūlttyq közqarasyna kesırın tigızbeitın saiasatty ūstanu kerek. Eŋ ülken demokratiia – sol. Al, jalpy adamzattyq demokratiia bükıl halyq üşın ämbebap desek, ülken qatelıkke ūrynamyz».
Mäjılısmen aldaǧy uaqytta mädeniet turaly zaŋnyŋ qaita qaraluy mümkın ekenın de äŋgımeledı. Söz barysynda ūlttyq mädeniet, ūlttyq kino jönınde oilaryn ortaǧa salyp, byltyrǧa deiın mädeniet turaly zaŋda bırde-bır «ädebiet» sözınıŋ bolmaǧanyna qynjylys bıldırdı.
Jiyn soŋynda halyq qalaulysyna gazet tılşılerı kökeilerındegı saualdaryn qoiyp, pıkırlerın bıldırdı. Ūlttyq salt-dästürdı jaŋǧyrtu, jurnalistıŋ märtebesın aiqyndau, Astananyŋ ırgesındegı tarihi jer – Taitöbenıŋ atyn Selinograd audanyna beru mäselelerı köterılıp, ūsynystar aityldy.
Ashat RAIQŪL
