Мектептегі медицинаны білім беру саласынан денсаулық сақтау жүйесіне беру туралы бастаманы Астана қаласы бірінші болып қолдады. Елорда әкімі Әділбек Жақсыбековтің тапсырмасымен күллі мектептегі медициналық кабинеттерді Денсаулық сақтау басқармасына беру туралы Жол картасына қол қойылды.
Мектеп медицинасы – үлкен сала. Соңғы жылдары оқушылардың арасында әртүрлі аурулар көбейіп кеткен. Мысалы, профилактикалық тексерулердің нәтижесі бойынша соңғы үш жылда жеткіншектердің арасында тыныс алу органдарының аурулары бірінші орынға шыққан. Екінші орында ас қорыту жүйелерінің сырқаты болса, үшінші орында – көз аурулары. Сондықтан мектептегі медицинаны кәсіби мамандардың қолына тапсырып, ерекше көңіл аудару қажет.
Астана қалалық Денсаулық сақтау басқармасының басшысы Ерік Байжүнісовтің айтуынша, бұл мектептегі медицинаның сапасын арттырып қана қоймай, онда жұмыс істейтін медбикелердің жүктемесін де азайтпақ. Айталық, негізгі норматив бойынша мектепте жұмыс істейтін бір медбикенің қарауында 600 бала болуға тиіс. Қазіргі жағдай бойынша бір медицина қызметкері 3 мыңнан астам оқушыны қарауға мәжбүр. Ал Білім басқармасының басшысы Эльмира Суханбердиеваның айтуынша, мектеп медицинасы Денсаулық сақтау басқармасының қарауына өтсе де басқарма бұл мәселеге жауапты болып қала бермек. «Соңғы жылдары мектептегі медициналық кабинеттерге тиісті лицензиялардан бөлек, қажетті құрал-жабдықтар, дәрі-дәрмектер алынды. Бұл өзгерістер ең алдымен еліміздің болашағы – балалардың денсаулығын жақсартуға бағытталған» дейді ол.
Мектеп медицинасын Денсаулық сақтау басқармасының қарауына беру кезең-кезеңмен жүзеге асырылатын болады. Осыған сәйкес, мұнда жұмыс істейтін медицина қызметкерінің қызметтік міндеттері мен рөлі қайта қаралып, штаттық нормативтерін есептеу жүргізіледі.
Қымбат Тоқтамұрат
Материалды «Астана ақшамы» газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
