Күн жылынып, қар ерігелі бері қаладағы коммуналдық шаруашылық мамандары көктемгі қарбалас жұмыстарға қызу кірісіп те кетті. Бүгінгі таңда елордадағы үш ауданда да су тасқынына қарсы жұмыстардың жоспары пысықталып, су ағатын арықтар мен жолдар шұғыл түрде қардан тазартылуда.
Осыған орай, биыл наурыз айынан бастап Алматы ауданы бойынша су тасқынына қатысты түскен өтініштер мен арыздарды қабылдайтын арнайы бірегей анықтамалық телефон желісі қызмет атқаруда. Оған күн сайын 48-43-37 нөмірі арқылы хабарласқан тұрғындар, әсіресе, жеке секторлардағы қарды шығару жөнінде өтініш білдіруде.
Биылғы жылдың басында «Астана Тазалық» ЖШС-мен аудан басшылары арасында бекітілген кестеге сәйкес, мамандар осы маңдағы кәріздер мен су жүретін арналарды қардан және мұздан тазартуда. Бұл ретте Астана қаласы Төтенше жағдайлар департаментінің қызметкерлері жақында аудан тұрғындарына көктемгі су тасқыны мен өрт қауіпсіздігі тақырыбында жадынамалар таратып, төтенше жағдай кезіндегі әрекеттер туралы түсіндіру жұмыстарын жүргізді.
Көктемгі су тасқынға қарсы жұмыстардың барлығын Алматы ауданы әкімі аппаратындағы аудан аумағынан көктемгі су тасқынын өткізіп жіберу жөніндегі арнайы штаб бақылап, қадағалап отыр. Астана қаласы әкімінің тапсырмасы бойынша су тасқынының алдын алуға жауапты басқармалармен, коммуналдық қызметтермен, кәсіпорындар және мердігер ұйымдармен толықтырылған осы штаб құрамындағылардың басты мақсаты – апатты жағдайлардың алдын алу.
Бүгінге дейін аудан аумағындағы 100-ден аса әлеуметтік нысанның, соның ішінде 36 балабақша, 38 мектеп, 27 денсаулық сақтау нысанының маңайы ауданның мердігер ұйымдарының көмегімен қардан тазартылып, осы уақытқа дейін жалпы көлемі 13 946 метр болатын 32 көшедегі кәріз құдықтары қардан және қатқан мұздан арылды. Жалпы, су тасқынына қарсы іс-шараларға аудан бойынша 3 жер қазу құрылғысы бар машина және 1 бульдозер, 65 арнайы дайындалған техника, 2 сусорғыш машина, 14 мамандандырылған техника сақадай сай.
Гүлбаршын Өкешқызы
Материалды «Астана ақшамы» газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
