Үстіміздегі жылдың 29 мамырында түс кезінде Қалалық балалар инфекциялық ауруханасына үш жарым жасар бала ауыр халде келіп түскен-ді. Баланың кеселі: «Менингококк инфекциясы, жайылған түрі, менингит+, менингококцемия ауыр түрі деп анықталған. Бактериологиялық зерттеудің нәтижесінде диагноз тағы да нақтыланады. Осы оқиғаға байланысты аурухана басшылары бұқаралық ақпарат құралдары өкілдеріне түсініктеме берді.
«Сәби ата-анасымен 18 сәуірден 23 мамыр аралығында Алматы қаласында болған. 27 мамырда баланың қызуы көтеріліп, жедел жәрдем шақыртқан. Ауруы асқынып, денесінің қызуы түспеген соң ауруханаға жеткізілген» деді бас дәрігердің медициналық қызмет сапасын бақылау жөніндегі орынбасары Роза Өтегенова.
«Баланың қызуы көтерілген сәтінен неге ауруханаға жеткізілмеген?» деген журналистердің сұрағына дәрігер менингиттің белгісі кәдімгі ОРВИ, яғни тыныс жолдарының қабынуындай басталатынын айтты.
Тұмау сияқты баланың температурасы көтеріліп, тамағы қызарып, лоқси бастайды. Дерттің маусымдық ушығуы көктем мен күзге келетін
себепті де қатерлі белгісін бірден анықтау қиын екен. Егер аурудың жайылған түрі болса, онда терісі бөртіп кетеді. Ал дене қызуы 38 градустан әрі қарай көтеріліп, денесі жиырылып, қалшылдай бастайды. Бұл, әсіресе, балалардың суықтан ауырған сәттерінің көбіне тән келеді.
Өткен жылдың өзінде бес адам осындай қауіппен тексеріліп, оның төртеуінде менингит вирусы табылып, бесіншісінің бұл ауруға шалдықпағаны анықталған. Астанада менингококк инфекцияның таралуы ресми тіркелген жоқ.
Десе де, бұл – өте қатерлі ми ауруы. Мұнымен көбінесе балалар ауырады. Кесел ми мен жұлынның жұмсақ қабықтарының қабынуынан туындайды. Ең алғаш рет ауру 1805 жылдары анықталыпты. Оған қарсы емдiк препаратты 1887 жылы А.Вейксельбаум ойлап тапқан екен.
Аурухана дәрігерлері науқастың қаншалықты тез сауығып, қатарға қосылатыны туралы ақпарат берді. Ем қонып, сәбидің беті бері
қараса, он күндей терапиялық ем-домын алады. Содан кейін бір жылдай диспансерлік есепте тұрып, дәрігерлердің қадағалауында болады. «Дер кезінде диагноз қойылып, дұрыс емін алса жақсы. Алайда уақыт жіберіп алып, дәрігерге кеш қаралса, жүйке жүйесіне әсері болады» дейді аурухана бас дәрігерінің орынбасары.
