Жақында елорда әкімдігінде техникалық реттеу мәселелері жөніндегі өңірлік штабтың кезекті отырысы өтті.
Жиынға Астана әкімінің орынбасары Андрей Лукин, ҚР ИДМ Техникалық реттеу және метрология комитеті төрағасының орынбасарлары Ғалымжан Дұғалов және Ержан Қарасаев, «Қазақстан стандарттау және сертификаттау институты» мен «Қазақстан метрология институты» РМК, «Ұлттық аккредиттеу орталығы» ЖШС басшылары, Астана қаласының кәсіпкерлер палатасы, Қазақстан мұнай және газ институты, Мұнай және газ ақпаратты-талдамалық орталығы, Қазақстан жанармай ассоциациясы, қаладағы жанармай құю стансалары, мұнай базалары, мұнай және мұнай өнімдерін сату және өңдеу саласындағы ірі компаниялар, сонымен қатар, қалалық бизнес-қауымдастықтың өкілдері қатысты.
Алдымен сөз алған Астана қаласы әкімінің орынбасары Андрей Лукин техникалық реттеу саласында жаңа стандарттардың енгізілуі – Қазақстанның нарығын сапасыз өнімдерден қорғауға, отандық өндірушілердің бәсекеге қабілеттігін арттыруға үлкен қолдау болатынына айрықша тоқталды.
– Үкімет бұдан екі жыл бұрын техникалық реттеу және метрология жүйесін жетілдіру жөніндегі 2020 жылға дейінгі кешенді жоспар бекіткен болатын. Осы жоспар республикамыздағы техникалық реттеу жүйесінің қолданыстағы тәсілін түбегейлі жетілдіреді және отандық өндірушілер мен сыртқы экономикалық қатынаста жұмыс жасайтын компаниялардың әлемдік нарықта бәсекеге қабілеттілігін арттыруға септеседі. Біз өз кезегімізде техникалық реттеу саласында мемлекеттік-жеке меншік серіктестікті дамыту бойынша мүдделі тараптардың өзара әрекетін қамтамасыз етуге тиіспіз. Индустрияландыру картасына, «Бизнестің жол картасы – 2020» бағдарламасына сәйкес елордада техникалық реттеу саласында бірыңғай техникалық саясат қажет, – деді А.Лукин.
Қала әкімінің орынбасары өз баяндамасында техникалық реттеу саласында мемлекеттік ұйымдардың, Ұлттық кәсіпкерлер палатасы өңірлік кеңесінің, салалық бизнес-қауымдастықтардың, тұтынушылардың құқығын қорғау қоғамының және басқа да қоғамдық бірлестіктердің әрекеттері жан-жақты үйлестірілетінін, «Техникалық реттеу туралы» Заңды іске асыруда мемлекеттік және корпоративтік секторларға жәрдем беру мәселесін егжей-тегжей әңгімелеп берді.
Оның айтуынша, тәртіпке келтірілген жұмыс отандық нарықты қауіпті және сапасыз өнімнен қорғауға, әлемдік стандарттарға сәйкес өнім шығаруға қажетті жағдайлар жасауға, менеджмент жүйесін енгізуге, сондай-ақ, ішкі нарықтың инфрақұрылымын жасап, индустрияландыру картасы аясында жобаларды сәтті іске асыруға мүмкіндік бермек.
Жиында сала мамандары тасымалдауға және қолдануға дайындалған мұнайға қауіпсіздік талаптарын орнататын ЕЭО техникалық регламентін де талқыға салды. Бұл жобаның негізгі мақсаты – адам денсаулығы мен қоршаған ортаны қорғау. Регламентте барлық тиісті талаптар бар және ол 2017 жылғы 1 наурызға қарай енгізілмек.
Бұдан соң Техникалық реттеу және метрология комитеті төрағасының орынбасары Ғалымжан Дұғалов өткізіліп жатқан іс-шараның маңыздылығын атап өтіп, күн тәртібіндегі келесі мәселелерді тізбектеп шықты.
– Тасымалдауға және қолдануға дайындалған мұнайға қауіпсіздік талаптарын орнататын ЕЭО техникалық регламенті жобасын, жанармай сапасына өтпелі бақылау жүйесін, сонымен қатар «Мұнай өнімдерін өндірушілердің өндірістік объектілерінің, мұнай өнімдері базаларының және жанармай құю стансалары резервуарларын есепке алатын бақылау аспаптарымен жарақтандыру бойынша қағидалар мен талаптар» жобасын қарастыруымыз қажет, – деді Ғалымжан Тілектесұлы.
Шара аясында Астана қаласының өңірлік штаб мүшелері «ҚазМұнайГаз Өнімдері» ЖШС мұнай өнімдерін іріктеу және сынау жөніндегі аккредиттелген сынақ зертханасына барып, жанармайды өтпелі бақылау жүйесімен және жаңа сынақ жабдықтарымен танысты.
М. ШАМҰРАТОВ, astana-akshamy.kz
