Астана тұтынушыларды отандық өнімдермен қамтамасыз ету жағынан аймақтар арасында көшбасшы орынға шығып отыр. Өткен жылдың соңында ғана елорда төрінде қазақстандық кәсіпорындар тіккен киім-кешек сататын әмбебап орталық ашылған болатын. Ал, өткен аптада бас қалада тек қана елімізде өндірілген азық-түлікті саудалайтын алғашқы дүкен есігін айқара ашты. Бұл екі жоба да Қазақстанда тұңғыш рет жүзеге асырылып отыр.
Дүкеннің ашылуында сөз сөйлеген Қазақстан сауда кәсіпорындары қауымдастығының вице-президенті Жібек Әжібаева сауда орнында сатылатын азық-түлік тауарларының бағасына 15 пайыздан артық үстеме қосылмайтынын айтады. Ал, аталмыш жобаны қолға алған «Халық маркасы» жобасының жетекшісі Римма Тәжібаеваның айтуынша, дүкеннен еліміздің барлық облыстарында өндірілетін азық-түлік тауарларын табуға болады.
«Дүкеннен Қазақстанның барлық аумақтарынан әкелінген азық-түлік түрлері бар. Сөрелерге үш жүзден астам отандық тауар брендтерінің екі мыңнан астам аталымы қойылған. Бұл – тұтынушылар мойындаған, халықтың жақсы бағасын алған тауар маркалары. Қазақстандағы алғашқы дүкен елордада ашылғандықтан оған «Астана. Халық маркасы» атауын қойдық. Болашақта еліміздің барлық өңірінде осындай дүкендер желісін ашпақшымыз. Оның әрқайсысының өз атауы болады» дейді Римма Тәжібаева.
Оның айтуынша, еліміздің барлық аймағында тек отандық азық-түлік сататын 22 дүкен ашу жоспарлануда.
Аманғали ҚАЛЖАНОВ
Материалды «Астана ақшамы» газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
