Астанада 9 қыркүйек күні Қанат Ислам мен канадалық Брэндон Кук кездеседі. Бұл бокс кешінің шеңберінде қолғап түйістіретін қазақстандықтардың есімі белгілі болды.
«ЭКСПО-2017» халықаралық мамандандырылған көрмесінің аясында ұйымдастырылып жатқан жекпе-жек шаршы алаңда жеңіліп көрмеген мықтылардың арасында өтпек. Брэндон Кук Қанат Исламның осы уақытқа дейінгі ең тегеурінді қарсыласы болмақ. Ол кәсіби бокста 19 кездесу өткізіп, барлығында мерейі үстем болған.
Бұл бокс кешінің көрігі тағы 8 кездесумен қыза түседі. Нақтырақ айтсақ, Жанқош Тұраров, Жәнібек Әлімханұлы, Мейірім Нұрсұлтанов, Руслан Мырсатаев, Али Ахмедов, Айдос Ербосынұлы, Димаш Ниязов және Руслан Жанайбаев өзге елдердің беткеұстар боксшыларымен күш сынасады.Бокс кеші «Сарыарқа» велотрегінде өтеді.
