Астана қаласы әкімдігінің арнайы жұмыс тобы БАҚ өкілдерімен бірге елордадағы көмір сататын бірқатар кәсіпорынға барып, ондағы жағдайды өз көздерімен көріп, жұмыс барысын қадағалап қайтты.
Жұмыс тобы алдымен Герцен көшесі, 6/2 мекенжайындағы кәсіпорынға ат басын тіреді. Мұнда бағасы 11500 теңге тұратын кузнецк көмірі ғана бар болып шықты. Ал осы жерге жақын маңда орналасқан Герцен 6/1 мекенжайындағы кәсіпорында қаражыра көмірі сатылуда. Отынның бағасы 14000 теңге болса, тұтынушылар бағасы – 13500, ал қалыпты баға – 10500 теңге. Жұмыс тобы барған уақытта кезекте тұрған 90-ға жуық жүк көлігінің 60-сына көмір тиеліп жатты. Кезектегі Мейрам есімді тұтынушымен тілдескенімізде, ол көмір сатып алуға кезекте тұрғандардың алды түнгі сағат 3-тен бері осы жерге келгенін айтты.
– Соңғы 2-3 күннен бері бұл жерде көмір болмап еді. Бүгін бар екен. Бірақ түстен кейін аяқталып қалуы мүмкін. Бастысы, мұндағы кезек күту жағы жолға қойылыпты. Әйтпесе, бұрын кезекке тұрғандар арасында төбелес жиі болып қалатын, – дейді Мейрам.
Ал Көктал көшесі, 78 мекенжайындағы кәсіпорында қаңтарыла кезек күткендер қатары қалың болды. Жүк көліктеріне отын тиеу жұмысы баяу жүріп жатқанына, бірнеше вагон көмірдің түсірілмей тұрғанына көпшілік наразылық танытты. Алайда кәсіпорын басшысы Дулат Құсайын мұндағы дүрлігудің себебін түскі үзіліспен байланыстырды.
– Шұбаркөл – 11500, Майкөбе – 9500, ал Богатырь 6500 теңге тұрады. Түске дейін
60 жүк көлігіне отын тиеліп жөнелтілді. Ал вагондардағы көмір түстен кейін түсіріледі. Отын барлық тұтынушыларға жетеді. Бүгінше ең соңғы сатып алушыға
дейін қызмет көрсете береміз. Сондықтан мұнда дау-дамай болмайды, – деді кәсіпорын басшысы.
М.Дулатов көшесі, 182 мен Алаш тас жолы 19/1 мекенжайларында көмір отыны болмады. Жұмыс тобы бұл кәсіпорындар қақпасының сыртынан қайтты.
Нұрдәулет КӘКІШЕВ
