Құрметті астаналықтар және қала қонақтары!
Сіздерді Жаңа 2017 жылмен шын жүректен құттықтаймын!
Еліміз тағы бір жылды еңсеріп, күнтізбеде жаңа жылдың беті айқара ашылды. Тарих қойнауына аттанғалы тұрған жыл еліміз үшін жемісті болды.
Біз Тәуелсіздіктің жиырма бес жылдық белесін зор табыспен қарсы алдық. Елбасының салиқалы саясатының арқасында ширек ғасырда бүкіл әлем Қазақстанды өзгелермен терезесі тең, қуатты әрі мерейлі мемлекет ретінде таныды.
Өтіп бара жатқан жыл Астана үшін аса табысты болды. Елорда тұрғындарының саны 1 миллионға жетті. Алғаш рет қала қазынасына 1 триллион теңге түсті. Елорданың үлесі ел бюджетінің 18 пайызын құрап, республикалық бюджеттің донорына айналды. Сондай-ақ, осы жылы 2 млн шаршы метр тұрғын үй пайдалануға берілді. Бұл 2015 жылмен салыстырғанда 1,8 есеге артық.
Біз келер жылы да осы қарқынды еселейтін ауқымды жұмыстар жүргізетін боламыз. Елбасының бекіткен бағдары – айқын, мұрат-мақсаты – биік.
Халқымыз «Ескi жыл есiркесiн, жаңа жыл жарылқасын» дейді. Өткен жылға өкпе жоқ, ал келер жылдан үмiтiмiз де, тiлегiмiз де көп.
Жаңа жыл ырыс пен берекенің бастауы, жақсылық пен қуаныштың жаршысы болғай. Сіздерге зор денсаулық, еңбектеріңізге береке тілеймін!
Құрметпен,
Астана қаласының әкімі Әсет Исекешев