ШАТТЫҚ ОТАНЫНДА ШАБЫТТАНДЫ
Жақында Астана қаласы мемлекеттік академиялық филармониясының Қазақ оркестрі ХХ концерттік маусымын ашты. Осыған орай Конгресс-холда көрнекті қазақ композиторы Сыдық Мұхамеджановты еске алуға арналған «Шаттық Отаны» концерті өтті.
КСРО және Қазақ ССР халық әртісі, Мемлекеттік сыйлықтың лауреаты Сыдық Мұхамеджанов – республикамыздағы музыкалық мектептің негізін қалаған композиторлардың бірі. Артына мол мұра қалдырған шығармашылық иесі операларды, симфонияларды, ораторияларды, әндерді, романстарды тудырып, хорлар мен концерттерге, драмалық қойылымдар мен кинофильмдерге арнап музыка жазды. Концертте филармония ұжымы осының бәрін қамтуға тырысты.
Қазақ оркестрінің орындауындағы композитордың «Қазақ увертюрасы» шығармасымен ашылған концерт әрі қарай «Қыз қуу», «Классикалық күй», «Шаттық Отаны» симфонияларына, «Мереке» поэмасына жалғасты. Оркестрдің бас дирижері және көркемдік жетекшісі, ҚР еңбек сіңірген қайраткері, профессор Айтқали Жайымов пен ҚР Мәдениет қайраткері Нұрлан Бекенов музыканттарға бұл туындыларды шебер ойната білді.
Басынан аяғына дейін оркестрдің сүйемелдеуімен өткен кеште филармония әншілері де жарқырап көрінді. Сыдық Мұхамеджановтың «Қаздар қайтып барады» әнін орындаған ҚР еңбек сіңірген қайраткері Қияқбай Асанбаев көрермендерді әсем саз бесігінде тербетті. «Көктем вальсі» туындысын айтқан халықаралық конкурстардың лауреаты Айзада Қапонова жиналғандарды серпілтіп өтті.
Композитор тудырған «Айсұлу» операсының дүниеге келгеніне жарты ғасырдан асты. Осы операдағы Айсұлудың ариясын айтқан ҚР еңбек сіңірген қайраткері Бибігүл Жанұзақ, Серкенің каватинасын шырқаған «Дарын» мемлекеттік жастар сыйлығының иегері, ҚР еңбек сіңірген қайраткері Азамат Жылтыркөзов өз партияларын тамаша алып шықты.
Сыдық Мұхамеджанов – ұлы Абайдың өлеңдеріне ән жазған алғашқы композиторлардың бірі. Тіпті ол Абайдың жан дүниесін терең түсінді деп айтсақ, артық кеткендей болмаспыз. Соның жарқын мысалы ретінде концертте Азамат Жылтыркөзов орындаған «Жарқ етпес қара көңілім не қылса да» әнін, Бақтияр Омаров әуелеткен «Өлсе, өлер табиғат» туындысын, республикалық және халықаралық конкурстардың лауреаты Шаһризада Тыныштық айтқан «Таңғажайып бұл қалай хат» шығармасын және Алтынбек Әбілдә шырқаған «Құлақтан кіріп, бойды алар» романсын айтуға болады.
Өткен ғасырдың орта шенінде Қанабек Байсейітов пен ақын Қуандық Шаңғытбаевтың қаламынан «Беу, қыздар-ай» комедиясы туды. Бұл шығарманы музыкамен Сыдық Мұхамеджанов көркемдеді. Нұрай Танабаев осы комедияда айтылатын «Әйтеуір сол қыз бір сұлу» әнін де айтып, жиналғандардың делебесін қоздырды. Осылайша көрермендерді бірде тәтті мұң құшағында тербетіп, бірде жиналғандардың көңілін көтерген концерт баршаға ұнап, классик композитордың рухын жаңғыртты.
Филармония көрермендерге алда әлі талай тамаша кештерді сыйламақ. Соның бірі, ертең, 23 қыркүйек күні Конгресс-холл сахнасында сағат 19.00-де өтетін «Ұлытаудан қанат қаққан Тайжан ақын» концерті. Бұл кеш сырнайын сақ-сақ күлдірген ақын, әнші, композитор, күрескер азамат Тайжан Қалмағамбетовтың шығармашылығына арналады.
Аманғали ҚАЛЖАНОВ