ШОУ ДА, ЖЕҢІЛДІК ТЕ БОЛАДЫ
Астана қаласы әкімі аппаратының баспасөз қызметінің хабарлауынша, Конституция күні қаладағы сауда орталықтарында шоу-концерттер өтіп, тауарларға жеңілдіктер жасалады.
Атап айтқанда, мереке күні «Ханшатырда» «Ханталапай» ұлттық ойыны ойнатылып, сыйлықтар табысталады. 31 тамызда «Көк түркілер» ұлттық оркестрі қонақтардың делебесін қоздырып, құлақ құрышын қандырмақ.
30 тамыз күні «MEGA Astana» СОО-да бағалы сыйлықтар тігілген викториналар мен бірнеше ойындар ұйымдастырылып, концерт қойылады. Балаларға аквагрим жасату және естелікке фотосуретке түсу тегін болады.
«Сарыарқа» орталығында 7-8 жастағы 7 конкурсанттың қатысуымен шоу өтеді. Шараға қатысушылар өздерін таныстырып, төл туындыларын көрсетіп, өнерлерін ортаға салады. Сонымен қатар, келушілерге орталықта тауарларды жеңілдікпен сатып алуға мүмкіндік туады.
Мереке аясында «Керуен» СОО «Мектепке жол» акциясы аясында аз қамтылған отбасылардан шыққан балаларға көмек көрсетілмек. Бұл күндері орталыққа келушілерге жаңа топтамалар ұсынылатын болады.
«Азия Парк» СОО-да әнші Адам және басқа да өнер жұлдыздары мен би ұжымдарының концерттік бағдарламасы өтеді. 31 тамыз күні «Azia Park Live Muzic» саз кеші өтсе, 1 қыркүйекте концерттік бағдарлама қойылып, бағалы сыйлықтар ойнатылады. Сонымен қатар, келушілер кәнігі аспаздық шеберлік сыныбына қатысып, ойын залында сауық құруларына болады.
«Арсенал» кинотеатрында 30, 31 тамыз, 1 қыркүйек күндері «Менің Қазақстаным» атты балалардың сурет байқауы өтіп, кинотеатрда мерекелік фильмдер көрсетіледі.
«Аружан» – Астана қаласының әншілері мен бишілерінің концерттік бағдарламасын ұсынады.