Астанада шығармашыл жастардың халықаралық «Шабыт» фестивалі шымылдығын түрді. Он жетінші рет өткелі отырған байрақты дода күні кеше тек республикамыздың ғана емес, әлемнің бірнеше елінің таланттарының басын қосты. Ұйымдастырушылардың мәліметінше, 8 қарашаға дейін созылатын өнер бәсекесіне Ресей, Қырғызстан, Өзбекстан сынды мемлекеттерден 500-ге жуық жас өнерпаз келген.
Бейбітшілік және келісім сарайында өткен халықаралық шараның ашылу салтанатында Астана қаласы Мәдениет басқармасы басшысының орынбасары Нарима Мұхамбеталина сөз сөйлеп, барлық үміткерлерге сәттілік пен жеңіс тіледі.
Доданың биылғы қатысушылары «Классикалық музыка», «Журналистика», «Бейнелеу өнері», «Цирк өнері», «Балеттің жас әртістері байқауы», «Үздік әдеби шығарма» және жаңадан қосылған «Халық музыкасы» мен «Камералық музыка» аталымдары бойынша сынға түсіп, жеңімпаздарды анықтайтын болады.
Осылардың ішінде «Үздік әдеби шығарма» аталымы (поэзия) бойынша алғашқы кезең 15 қазанға дейін өтіп кетті. Бұл сынға қатысқан 150 үміткердің ішінен 100 ақын іріктеуден өтті. Ақындардың тізімін «adebiportal.kz» сайты жариялады. Олардың қатарында Ұлағат Ханзада, Динара Мәлік, Хамит Есаман сынды есімдері елге таныс болып қалған жыр дүлдүлдері де бар.
«Биылғы «Шабыттың» «Үздік әдеби шығарма» аталымының ерекшелігі – үміткерлердің өлеңдері «Әдебиет» порталында онлайн түрде ашық жариялануында. Бұрын ақындардың өлеңдері тікелей қазылар алқасы назарына ұсынылатын. Жабық түрде өтетіндіктен, талантты жастар еленбей қалып жататын. Биыл «Қазконтент» АҚ «Әдебиет порталы» интернет-жобасы мен Астана қаласы әкімдігі Мәдениет басқармасы өзара келісіп, үміткерлердің өлеңдерін ашық түрде халық алдына ұсынды. Оның үстіне, биылғы фестивальге қатысатын жастар екі есе көп болды: 150-ден аса ақыннан өтініш түсті. Ішінен қазылар алқасының ақылдасуымен 100 ақынды іріктедік» дейді қазылар алқасының мүшесі, «Әдебиет» порталының жетекшісі Бауыржан Қарағызұлы.
«Үздік әдеби шығарма» аталымының қатысушылары үшін Мәдениет қайраткері Нағима Өтепова, халық ақыны Фариза Оңғарсынова, ақын, әдебиет сыншысы Әмірхан Балқыбек атындағы арнайы сыйлықтар тағайындалып отыр.
Ұйымдастырушылардың айтуынша, «Шабыт» фестивалінің «Халық музыкасы» аталымы бойынша ең көп өтініш көрші Қытай мемлекетінен келіп түскен. Дарынды музыканттар сазсырнай, жетіген, сыбызғы сынды аспаптарда шебер ойнайды. Ал отандық қатысушылардың басым бөлігі – Оңтүстік және Солтүстік Қазақстан өкілдері.
Байқау көрсетілімдерінен бөлек, қосымша іс-шаралар ұйымдастырылады. Қазылар алқасы мүшелерінің концерті, музыкалық-көңіл көтеру шоуы, арт-клуб – танысу кеші, фестиваль лауреаттарына арналған қала әкімдігінің балы өтеді деп жоспарлануда. Сонымен қатар, ұйымдастырушы комитет штабында мәдени проблемалар мен өзге де өзекті тақырыптарда «дөңгелек үстел» өткізілмек. Және халықаралық деңгейдегі өнер жұлдыздарының шеберлік сағаттары жастар үшін аса маңызды уақиға болмақ. Ал байқау жеңімпаздары мен лауреаттарын марапаттау Гала-концертпен аяқталады.
Халықаралық өнер додасын өткізуге Астана қаласы әкімдігі мен Астана қаласы Мәдениет басқармасы және Қазақ Ұлттық өнер университеті қолдау көрсетуде. Шара соңында дәстүр бойынша Президент Кубогы табысталады.
Асхат РАЙҚҰЛ
