Үміткерлер үгіт-насихатын бастайды
Астана қаласының мәслихаты кезектен тыс сайлауға дайындық жүргізуде. 26 наурызда №20 сайлау округінде қалалық мәслихат депутаты сайланады.
– Аталмыш округ бойынша сайланған депутаттың мемлекеттік қызметке ауысуына байланысты, Қазақстан Республикасындағы сайлау туралы конституциялық заңына сәйкес, босаған орынға жаңадан мәслихат депутаты сайланады, – деп мәлімдеді Астана қаласының қалалық сайлау комиссиясының төрағасы Игілік Жалбыров.
Бас қаламыз бойынша бұл жұмысты 10 сайлау комиссиясы, оның ішіндегі 2 аумақтық, 1 округтік және 7 учаскелік комиссия ұйымдастырып, жүзеге асырады. Мәслихат депутатына дауыс беруге Алматы ауданының №35, 36, 37, 38, 63, 64, 82 сайлау учаскелері аумақтарында тұрып жатқан сайлаушылар қатысады.
«№20 сайлау округі бойынша 5 адамнан ұсыныс түсті. Оның ішінде 2 адам саяси партия атынан, яғни «Нұр Отан» партиясы мен Қазақстанның халықтық коммунистік партиясы атынан ұсынылды. Қалған үшеуі өзін-өзі ұсыну бойынша тіркеліп отыр. Үміткерлердің 4-еуінің білімі жоғары, сонымен бірге орташа арнаулы білімі бар бір азамат тіркелген. Барлық кандидаттар Қазақстан Республикасындағы сайлау туралы конституциялық заңына сәйкес, тексеруден өткен. Осы жылдың 11-25 наурыз аралығында үміткерлер сайлауалды үгіт-насихатын жүргізіп, өз сайлаушыларымен кездесе алады. Ол үшін барлығына тең жағдай қарастырылған» деп атап өтті қалалық сайлау комиссиясының төрағасы.
Айгүл УАЙСОВА