Қыс бітіп, қалың қар ери бастаған кезде су басу қаупі арта түсетіні белгілі.
Сол себепті елордада селдің алдын алу жұмыстары басталып кетті. Кеше Астана қаласы Төтенше жағдайлар департаментінің ұйымдастыруымен «Көктем-2017» республикалық командалық-штабтық оқу-жаттығулары аяқталды.
Биыл қалада қар мен жауын-шашынның мөлшері әдеттегіден екі есе көп. Осы орайда, төтенше жағдай қызметкерлерінің басты міндеті – қаланы қардан тазалап, тасқынды болдырмау. Қазіргі таңда қала бойынша тасқын жүруі мүмкін 37 аумақ белгілі. Олардың төртеуі Сарыарқа ауданына қарасты. Күннің күрт жылуынан 300-ге тарта жекеменшік үйі бар Көктал кентін су шайып кету қаупі жоғары. Елді мекендегі Мүгедектер мен қарттарға арналған медициналық әлеуметтік мекемесі Есіл өзеніне жақын орналасқан. Сол себепті мамандар арнайы оқу-жаттығу жұмыстарын дәл осы жерден бастады.
Астана қаласы Төтенше жағдайлар департаментінің басшысы, азаматтық қорғаныс полковнигі Барат Дұзақбаев сақтық шаралары туралы баяндап берді:
– Біздің бөлімге Көктал-1 ықшам ауданында су басу қаупі туындағаны туралы дабыл келіп түсті. Соған сәйкес нақты тапсырмалар беріліп, дайындық жұмыстары пысықталды. Мәселен, №3 өрт сөндіру бөлімшесінде арнайы штаб құрылып, оған қаланың барлық жедел қызметтері мен апатты-құтқару жасағы тартылды. Олардың әрқайсысы өз бағыты бойынша жағдайды қадағалайды. Қала бойынша су тасқынына дайындық жұмыстары жақсы жүріп жатыр.
Тактикалық оқу-жаттығулары барысында құмға толы қаптардан қорғаныс үйінділерін жасау, қарды тазалап, шығару, тасқыны болған жерлерден суды сорып алу жұмыстары жүргізілді. Сондай-ақ, зардап шеккендерге жылыту мен тамақтандыру пункттерін ұйымдастыру, адамдарды қауіпсіз жерге көшіру сияқты су тасқынына қарсы әрекеттер жоспарланған.
Көкталдағы құтқару шараларына 117 маман қатысып, 36 техника тартылды.
Гүлдана ТАЛҒАТҚЫЗЫ
