Мәжіліс төрағасы Нұрлан Нығматулин мен бірқатар депутаттар «Астана ЭКСПО-2017» аумағында жүргізіліп жатқан құрылыс нысандарымен танысты және халықаралық көрмеге дайындық мәселесіне арналған кеңеске қатысты.
Мәжіліс төрағасы «Астана ЭКСПО-2017» көрмесі аясында ауқымды жұмыстар атқарылғанына тоқтала келе, таяу уақытта Астана энергия үнемдеу мен баламалы энергия көздерін пайдалануда әлемдік үздік технологиялар үшін орталық алаңға айналатынын, көрмеге дайындық аясында депутаттық корпус та елеулі үлес қосқанын, атап айтқанда, халықаралық көрмелер туралы конвенция ратификацияланғанын, ЭКСПО-2017 халықаралық мамандандырылған көрме мәселелері жөнінде заң қабылданғанын атап өтті.
«Қазақстан Президенті Нұрсұлтан Назарбаевтың халықаралық жоғары беделінің арқасында еліміз осы бірегей шараны өткізу құқығына ие болды» деп еске салып өтті Н.Нығматулин. «ЭКСПО-2017» нысандарын аралау барысында Мәжіліс спикері халықаралық көрмеге билет сатып алды. Осы орайда Мәжіліс төрағасы бүгінде көрме жаһандық ұлттық жоба мәртебесіне ие болып отырғандығын атап айтты.
«Астана ЭКСПО-2017» ұлттық компаниясының өкілдері құрылыс барысы жайында тыңғылықты мәлімет беріп, алдағы уақытта атқарылатын шаралар жайында баяндап берді.
