Астана қаласында 10-12 қазанда «ExpoGroup» халықаралық көрме компаниясының ұйымдастыруымен «Astana International Auto Salon-2014» (AIAS-2014) екінші халықаралық автокөлік көрмесінің салтанатты ашылуы өтеді.
Қазақстанда алғашқы электромобильді таныстырған халықаралық дәрежедегі елордалық автосалон биыл өзінің желісін гибрид автомобильдермен кеңейте түспек. Іс-шара «жасыл» тақырыпты жалғастыра келе, қазақстандық жолдарда қоршаған ортаға ең аз шығынмен инновациялық
технологияларды енгізудегі маңызды қадамға айналмақ. Бұл – «Болашақ энергиясы» тақырыбында өтетін «ЕXPO-2017» халықаралық мамандандырылған көрмесін өткізу қарсаңындағы аса маңызды мәселе.
«AIAS-2014» экспозициясында «Mitsubishi», «Renault», «Jeep», «Volkswagen», «Maserati», «SsangYong», «Peugeot», «Iveco», «Hyundai», «Lada», «Skoda», «Kia», «Chevrolet» және басқа да әлемдік және отандық брендтер ұсынылады. Келушілер көлік аксессуарлары, қосалқы бөлшектер, автохимия мен автокосметика, тюнинг, автоэлектроника, автонесиелеу мен автосақтандырумен таныса алады.
Көрме ҚР Инвестициялар және даму министрлігінің, Астана қаласы әкімдігінің және қазақстандық автокөлік бизнесі қауымдастығының қолдауымен «Көрме» орталығында өтеді.
Жақсы СӘТҰЛЫ
