Алғыс айту күні – ең алдымен, елімізде тыныштық пен үндестік, өзара сенімділік пен барлық қазақстандықтарға деген құрметтің орнығуына негіз болған Президенттің бейбітшілік пен келісім саясатының салтанат құрған күні.
Бұл – Қазақстан жеріне еріксіз қоныс аударған түрлі этнос өкілдерінің құтты мерекесіне айналған қасиетті қазақ жері мен қонақжай қазақ халқына терең тағзым белгісі. Қиын-қыстау заманда олардың басына түскен ауыртпалықты қайыспай бірге көтере білген қандастарымыз өз үлгісін түрлі ұлт өкілдерінің арасындағы адамгершілік қарым-қатынастың өнегелі өлшеміне айналдырды.
Алғыс айту күні – қилы кезеңнің қиындықтарын иық тіресе бірге еңсеріп, қысқа мерзім ішінде Елбасының басшылығымен Тәуелсіз Қазақстан құру жолында аянбай тер төккен еліміздің барлық азаматтарының бір-біріне құрмет білдіретін күн. Сондықтан ол Қазақстанның тағдыр тоғыстырған көпэтносты халқының ортақ тарихын құрметтеу күні болады.
Алғыс айту күні – қайырымдылық дәстүрлерін, әлеуметтік ынтымақты және өзара көмек көрсетуді қолдау күні. Бұл – репрессия мен депортация жылдарында біздің халық көрсеткен мейірімділік пен ақкөңілдік, қолда бармен бөлісу мен көмек көрсетуге дайындықтың рухани дәстүрлерінің күні.
Алғыс айту күні – қазақстандық патриотизмнің, достық пен бірлігіміздің, мәдени саналуандығымыздың жарқын көрінісі, себебі Елбасы 100-ден аса этностың әрқайсысы өзінің қайталанбас өрнегін салуының нәтижесінде біздің Біртұтас Ұлтымыз бірегей артықшылықтар иесіне айналғанын атап өткен болатын.
Парасатты Президентіміз Нұрсұлтан Назарбаевтың сарабдал саясаты арқасында әлемдік қауымдастықтан өз орнын ойып алған Қазақстан бүгінде бейбітшілік бесігін тербеткен берекелі елге айналды.
Алғыс айту күні – Қазақстан халқын мәңгілікке біріктіруге бағытталған «Мәңгілік ел» жалпыұлттық патриоттық идеясының, қазақстандық бірегейліктің негізгі арқауы – еліміздегі барлық ұлт пен ұлысты бір шаңырақ астына топтастыратын Қазақстан халқы Ассамблеясының мерекесі.
Алғыс айту күні – бұл біртұтас азаматтық қағидаттарына негізделген қазақстандық қоғамды дамыту арқылы ел бірлігін нығайту. Қазақстан халқы Тәуелсіздіктің 25 жылдық мерейтойы қарсаңында тұңғыш мерекеленіп отырған Алғыс айту күні – еліміздің әр азаматының жүрегіне жақын, жарқын мерекелердің бірі болмақ.
Ләззат ҚҰСАЙЫНОВА,
Астана қаласы әкімі аппаратының Қазақстан халқы Ассамблеясы хатшылығының меңгерушісі
astana-akshamy.kz
