Ішкі саясат басқармасының басшысы Болат Тілеповтың төрағалығымен Астана қаласы әкімдігінің жанындағы Үкіметтік емес ұйымдармен ынтымақтастық және өзара қарым-қатынас жөніндегі консультативтік кеңестің отырысы өтті.
Үкіметтік емес ұйымдардың және этномәдени бірлестіктердің мәдени-бұқаралық іс-шараларын ұйымдастыру және өткізу кезіндегі мемлекеттік органдардың қолдауы мен ықпалдасу жұмыстары аясында атқарылған істерге қалалық Мәдениет басқарамасының басшысы Б.Мажағұлов шолу жасады. Сонымен қатар, әкімдік жанындағы Әйелдер істері және отбасылық-демографиялық саясат жөніндегі комиссияның салалық қоғамдық бірлестіктермен бірге атқарған жұмыстармен Л.Құсайынова таныстырды.
Елордалық үкіметтік емес ұйымдардың алдағы жұмыс жоспары жайына, Азаматтық форумға дайындық барысына «ҮЕҰ Астана форумы» заңды тұлғалар бірлестігінің жетекшісі Б.Ахметжанова тоқталып өтті.
Ол: «Меніңше, «әріптестерімізді» бір үстелдің басында жинап, бір-біріміздің көзімізге тура қарайтын уақыт жетті. Көптеген үкіметтік емес ұйымдардың жетекшілерін күндіз
шаммен іздеп таба алмаймыз.
Нақты жұмыс атқарып, мемлекеттің шын серіктесіне айналған ұйымдардың қызмет сапасын жақсартып, дараларын бағалауға тиіспіз» деді.
Келесі кеңесте ортақ мәселелерді оңтайлы шешу жөнінде орынды ой қозғалды.
Айгүл УАЙСОВА
