Кеше Астана әкімі Иманғали Тасмағамбетовтің қатысуымен 2014-2015 маусымындағы жылу беру науқанына арналған жиын өтті. Онда қала әкімінің орынбасары Василий Крылов және Есіл, Алматы, Сарыарқа аудандарының әкімдері мән-жайды баяндады.
Василий Крыловтың айтуынша, 29 қыркүйекте елордада жылу беру маусымы басталады. Қыстың қаһарына қазіргі уақытта қаладағы жылу орталықтары тас-түйін дайын көрінеді. Астана қаласы мәслихатының биылғы шешімімен қаланы жылыту мауысымына дайындау және оны өткізу ережесі бекітілген болатын. Жылу беру дәл осы ережеге сәйкес жүргізіледі.
«Білім беру, денсаулық сақтау және мәдениет нысандарының жылу беру маусымына дайындығы толығымен аяқталды. Жалпы алғанда, қала тіршілігін қамтамасыз ететін мекемелер жылу беру маусымында үздіксіз әрі тұрақты жұмыс істеуге, электр энергиясын жеткізуге толық дайын. Ауа райын болжаушыларға сенсек, ертеңнен бастап күн суытып, ауа температурасы төмендейді, жауын-шашын түседі. Жалпы, біз қыркүйектің 29-ы, яғни, алдағы дүйсенбіден жылу беру маусымын бастауға дайынбыз» деді Василий Крылов.
Осыдан кейін аудан әкімдері кезек-кезек сөйлеп, өздеріне қарасты тұрғын үйлер мен әлеуметтік нысандардың жай-күйін, ондағы мәселелерді және жүзеге асқан жобалары туралы баяндады. Бірақ әлі де атқарылмаған жұмыстардың бар екенін аңғардық. Кейбір жауапты мекемелер сол жағалаудағы аздаған тұрғын үйді қысқы маусымға толықтай дайындап үлгермей жатыр екен. Алайда, бұл күні техникалық және қаржылай көмектің уақтылы беріліп тұрғанына байланысты мойнында міндеті барлардың сылтау айтатын еш реті жоқ екенін бәріміз білеміз.
Жиын соңында елорда әкімі Иманғали Тасмағамбетов халық арасынан қойылған сұрақтарға нақты жауап беріп, бұқараның боран мен аяздан қорқатын жөні жоқ екенін жеткізді. Оның сөзіне қарағанда, әлеуметтік саладағы 170 нысанның 103-іне жылу берілді. Ал дүйсенбіден бастап елорданың барлық балабақшаларына, мектептеріне, денсаулық сақтау нысандарына жылу беріледі.
«Елордада әлеуметтік саланың бірқатар нысанына жылу берілді. Нақтырақ айтсам, қазірдің өзінде Астана қаласындағы 29 денсаулық сақтау нысанының 14-іне жылу беріле бастады. Бұл – 48 пайызды құрайды деген сөз. Ал 64 балабақшаның 51-і, 57 мектептің 28-і жылу беру жүйесіне толығымен қосылды.
Бірақ, біз қазір бәрін жақсы деп кеткенмен, ертең-ақ техникалық ақаулар пайда болып, үлкен мәселе тауып беруі ғажап емес. Сондықтан кез келген мезгілде қол қусырып қарап отыруға болмайды. Өйткені, Астананың қысы бәрімізге мәлім: бірнеше күн бойы 35 градустан төмен аяз сақталуы мүмкін» деді Иманғали Тасмағамбетов.
Қазіргі уақытта орталықтан жылытылатын 2115 көппәтерлі тұрғын үйдің 2086-сында алдағы жылу беру маусымына дайындық жұмыстары аяқталған. Қорытындысында, Алматы ауданы 100 пайыздық көрсеткішпен қысқа дайын болса, Есіл ауданы – 93, ал Сарыарқа ауданы 98,1 пайыз дайын.
Нұрислам ҚҰСПАНҒАЛИ
