«ЖYРЕКТЕР YНДЕСТІГІ»
Астана қаласы Балалар құқықтарын қорғау жөніндегі басқарма жанынан құрылған «Жүректер үндестігі» клубы Л.Гумилев атындағы Еуразия ұлттық университетінде «Халық педагогикасындағы толық адам үлгісі» атты семинар-тренинг өткізді.
Семинардың мақсаты – «Өзін-өзі тану» пәнін оқытуда педагогтардың кәсіпқой шеберлігін қалыптастыру, студенттерге «толық адам» тәрбиелеуде «ішкі
тыныштық» жалпы адамзаттық құндылықтың мәні мен маңыздылығы жайында түсінік беру. Жиында университет оқытушысы А.Ілиясқызы екінші курс студенттеріне арнаулы сабақ өткізді. Аталған шараға қалалық Білім басқармасының әдіскері А.Мұқанова, әлеуметтік педагогика және өзін-өзі тану кафедрасының меңгерушісі Қ.Шалғынбаева, Еуразия гуманитарлық институты мен «Тұран» колледжінің оқытушылары қатысып, өзара тәжірибе алмасты.
Семинар-тренинг тыныштық сәтімен басталды. Студенттер дәйекті сөздерді талқылап, әңгіме аясында өз ойларын ортаға салды. Олардың әрқайсысына «Бақыт символын» ойлап табуға тапсырма берілді.
«Бір-бірімізге бақыт тілейік…» атты ойыны арқылы жылы тілектер, рухани лебіздер айтылды.
Клуб өзін-өзі тану педагогтарының кәсіби деңгейін жетілдіру үшін әдістемелік көмек көрсетеді, өзара тәжірибе алмасуды ұйымдастырады.
Лариса ТЕМІРЛИНА,
Астана қаласы Балалар құқықтарын қорғау жөніндегі басқарманың бас маманы