Әр азамат бәсекеге қабілетті болуға ұмтылуы қажет
Кеше «Қазақстан» орталық концерт залында Елбасының халыққа арнаған Жолдауындағы негізгі бағыттарды насихаттау мен түсіндіру жөніндегі республикалық ақпараттық-насихаттық тобының кезекті жиыны болып өтті. Оған Астана қаласы әкімінің орынбасары Аида Балаева қатысты.
– Президент мемлекеттің 2050 жылға дейінгі тұрақты дамуының тетіктерін айқындап берді. Қазақстандықтарға өркендеудің жаңа бағытын нұсқап, межелі мақсаттарды іске асыруға шақырды. Мұның бәрі бірінші кезекте елдің экономикалық қуатын көтеріп, жақсы өмір сүруін көздейтін жоспарлар екені сөзсіз, – деді Аида Ғалымқызы.
Бұдан кейін мінбеге көтерілген республикалық ақпараттық-насихаттық тобының жетекшісі, ҚР Қаржы министрі Болат Жәмішев Елбасы Жолдауындағы міндеттер әуелі елдің әлеуметтік ахуалын жақсартуға бағытталғанын айта келіп, соңғы бес жылда ана өлімі шамамен 3 есе азайып, бала туу көрсеткіші бір жарым есе, білім алуға жұмсалатын қаржы 9,5 есе өскенін атап өтті.
–Елбасы Қазақстан ХХІ ғасырдың ортасына қарай әлемнің ең дамыған 30 елінің қатарына қосылу міндетін қойып отыр. Осы мақсатқа жету үшін еліміздің әр азаматы бәсекеге қабілетті болуға ұмтылу қажет. Әлемдегі ең мықты 30 елдің қатарына қосылу үшін белгілі бір талаптар үдесіне сай болуымыз қажет. Қай салада да жетістіктеріміз озық болуы тиіс, – деді Қаржы министрі. Оның айтуынша, алдымызда жалпы ішкі өнімді, өндіріс өнімдерінің көлемін ұлғайту міндеті тұр. «Жасыл» экономикаға ден қоя бастаған мемлекетіміздің әр азаматы қуатты үнемдеу мәселесін де қаперінен шығармауға тиіс. Қай жағынан да экономикалық тайталасқа төтеп берген ел ғана мықтылардың қатарынан орын алмақ.
Әлеуметтік саланы дамыту бағыттары бойынша сөз сөйлеген ҚР Еңбек және халықты әлеуметтік қорғау министрлігінің жауапты хатшысы Аида Құрманғалиева еліміздегі әлеуметтік қорғаулар, зейнетақы жүйесін жетілдіру, жұмыссыздарды оқыту және қайта даярлау жөнінде егжей-тегжейлі баяндады. Оның айтуынша, соңғы бес жылда жәрдемақы көлемі 3 есеге өскен. Осы әлеуметтік көмекті республика бойынша 215 мың адам алса, соның 24 мыңы – астаналықтар. Көпбалалы аналарға арналған жәрдемақы еліміз бойынша 250 мың адамға берілсе, соның 3300-і елордалық әйелдер екен.
Жолдаудың білім саласына қатысты жүктеген міндеттері жөнінде сөйлеген ҚР Білім және ғылым министрлігі Ғылым комитеті төрағасының орынбасары Ербол Сүлейменов «Балапан» бағдарламасы бойынша 4 мыңға жуық мектепке дейінгі мекеме жаңадан салынғанын, олардың әрқайсысы қазіргі заман талаптарына сай келетінін айта келіп, биыл Астанада тағы ондаған балабақша ашу жоспарланып отырғанын жеткізді. Мектептерге инновациялық тың технологиялар енгiзу мәселесі де күн тәртібінен түспейтінін айтқан ол оқушылардың білікті азамат болып тәрбиеленуіне ата-аналар да белсене атсалысу керектігін еске салды.
Жиынның соңында республикалық ақпараттық-насихаттау топтары елордалықтарды толғандырған сауалдарға жауап берді.
Қымбат ТОҚТАМҰРАТ