قازاقستانداعى 2,2 ملن-نان اسا ادام نەمەسە رەسپۋبليكا حالقىنىڭ 11,5 پايىزى ىندەتكە قارسى تەگىن ەگىلەدى. بۇل تۋرالى دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەت Facebook-تەگى پاراقشاسىندا جازدى.
تەگىن ەكپە جاسالاتىنداردىڭ قاتارىنا اۋرۋ جۇقتىرۋ قاۋپى جوعارى ساناتتاعىلار: سوزىلمالى اۋرۋى بارلار, جۇرەك-قان تامىرلارى جانە قانت ديابەتىمەن اۋىراتىندار, سوزىلمالى وكپە اۋرۋىنا شالدىققاندار, 65 جاستان اسقاندار, سونداي-اق مەديتسينا قىزمەتكەرلەرى جاتادى.
«دەنساۋلىق ساقتاۋ مينيسترلىگى تەگىن ەگىلەتىندەردى 20 پايىزعا دەيىن جەتكىزۋ مۇمكىندىكتەرىن قاراستىرۋدا. ياعني بالالار جانە سوزىلمالى اۋرۋىمەن ديسپانسەرلىك تىركەۋدە تۇرعاندار, جابىق مەكەمەلەردىڭ قىزمەتكەرلەرى جانە وزگە ساناتتاعىلار وسىعان قوسىلادى» دەپ جازدى ب.قوجاحمەت. ونىڭ ايتۋىنشا, قازاقستان دۇنيەجۇزىلىك دەنساۋلىق ساقتاۋ ۇيىمى جانە جاھاندىق ەگۋ مەن يممۋنيزاتسيا اليانسىمەن بىرلەسىپ, COVAX Facility باعدارلاماسىنا مۇشەلىككە ءوتتى. بۇل باعدارلاماعا قاتىسۋشى ەلدەر حالقىنىڭ 20 پايىزىنا دەيىن ەگۋ ءۇشىن ەكپە الۋعا حاقىلى.
