فۋتبولدان بيىل قازاقستان چەمپيونى اتانعان ەلوردالىق «استانا» كومانداسى 2015 جىلى ۋەفا-نىڭ چەمپيوندار ليگاسىندا ەل نامىسىن قورعايتىن بولادى.
العاشىندا, اتاپ ايتقاندا, 2009 جىلى «قازاقستان تەمىر جولى» ۇلتتىق كومپانياسىنىڭ قولداۋىمەن قۇرىلعان «استانا» كلۋبى ەلىمىزدەگى جاس كوماندالاردىڭ بىرىنەن سانالادى. ەلوردالىق كوماندا بولعان سوڭ العاشقى ماۋسىمدا-اق وسى ۇجىمدا ويناۋعا جاقسى ويىنشىلار بىردەن ىقىلاس تانىتتى. ءسويتىپ, سالعان جەردەن «استانا» ۇلتتىق چەمپيوناتتىڭ كۇمىس جۇلدەسىنە يە بولدى. 2010 جىلى قازاقستان كۋبوگىنىڭ جەڭىمپازى اتاندى. 2011 جىلى ەل چەمپيونىمەن سىنعا ءتۇسىپ, ءار جىلدىڭ ماۋسىماشار ويىنىندا سۋپەركۋبوكتى ۇتىپ الدى. 2012 جىلى بىرىنشىلىك مەدالىن الۋعا جاقىن قالعان-اق ەدى. الايدا, سوڭعى ويىندارداعى جوعالتقان ۇپايلار جۇلدەگەرلەر قاتارىنان كورىنۋگە مۇمكىندىك بەرمەدى. ەسەسىنە 2013 جىلى وتە جيناقى ويىن ورنەگىن كورسەتە ءبىلدى. وسىلايشا «استانا» قىسقا تاريحىندا ەكىنشى رەت كۇمىس جۇلدەگە قول جەتكىزدى.
كوپ ىزدەنگەن, الدىنا بيىك ماقسات قويعان كوماندا بۇگىندە «استانا» پرەزيدەنتتىك كاسىپقوي كلۋبتىڭ مۇشەلىگىنە قابىلدانعان. مەملەكەت باسشىسى نۇرسۇلتان نازارباەۆتىڭ قامقورلىعىمەن جۇزەگە اسىرىلاتىن كلۋبقا تەك حالىقارالىق ارەنادا قازاقستان ابىرويىن كوتەرەتىن كوماندالار نەمەسە سپورتشىلار قابىلداناتىنى بەلگىلى. سوندىقتان دا «استانا» فۋتبول كلۋبى الدىنا دا ايرىقشا ماقساتتار قويىلىپ وتىر. وسى ورايدا, ەلوردالىق كوماندانىڭ ۋەفا-نىڭ كلۋبتىق تۋرنيرىندەگى العاشقى ويىندارىن جاقسى كوڭىلمەن اتاپ وتۋگە بولادى. ماسەلەن, بيىل جازدا «استانا» كومانداسى ەۋروپاداعى كلۋبتىق تۋرنيردە تۇساۋكەسەر ماۋسىمىن وتكىزىپ, قالىڭ جانكۇيەرىن قۋانىشقا بولەدى. اتاپ ايتساق,ەۋروپا ليگاسىنىڭ ءبىرىنشى اينالىمىندا ەرەۆاننىڭ «پيۋنيك» كومانداسىمەن سىنعا ءتۇسىپ, ەكى ويىندا قاتارىنان ۇتسا, ەكىنشى اينالىمدا ءيزرايلدىڭ «حاپوەل» كلۋبىن دا ايقىن باسىمدىقپەن تىزە بۇكتىرىپ, ءۇشىنشى راۋندقا شىقتى. بۇل جولى شۆەتسيا فۋتبولىنىڭ ليدەرى ايك كومانداسىنا قارسىلاس اتاندى. ەۋروپالىق فۋتبولدا وزىندىك ءداستۇرى قالىپتاسقان كومانداعا قارسى جان-جاقتى دايىندالعان ەلوردالىق «استانا» بارشا قازاقستاندىقتاردى, تىپتەن ەۋروپالىق مامانداردىڭ ءوزىن تاڭقالدىرىپ, ايك اسۋىن دا باعىندىرىپ قايتتى. «استانا ارەنا» ستاديونىندا وتكەن ءبىرىنشى ويىندا ەسەپ 1:1 بولىپ اياقتالعان ەدى. قالاي دەگەنمەن ازۋلى قارسىلاسپەن وسىلاي ويناعانىمىزعا دا قاناعات ەتكەنىمىزدى نەسىنە جاسىرامىز. الايدا, ءبىزدىڭ كوماندانىڭ بۇكىل پوتەنتسيالى تولىق اشىلماعانىن اڭعارماعان ەكەنبىز. ستوكگولمدە وتكەن قارىمتا ويىندا «استانا» كەرەمەت ويىن كورسەتە ءبىلدى. شۆەتسيا استاناسىندا استانالىقتار قارىمتاسىز ءۇش گول سوعىپ, ايدى اسپاننان ءبىر-اق شىعاردى. وسىلايشا, «استانا» ۋەفا ەۋروپا ليگاسىنىڭ پلەي-وفف سىنىنا ءتۇستى. ال بۇل سىندا وسالدار بولمايتىنى انىق. قارسىلاسىمىز ەۋروپاداعى ۇزدىك كوماندالاردىڭ ءبىرى «ۆيليارەال» بولدى. يسپانيا كومانداسىمەن بولعان ويىن شىنىمەن دە ءبىزدىڭ جاس كوماندا ءۇشىن وڭايعا سوقپادى. ەكى ويىننىڭ قورىتىندىسىندا چەمپيوندار ليگاسىنىڭ توپتىق تۋرنيرىنە يسپاندىقتار ءوتتى. وسى ويىنداردىڭ ءبارى ءبىزدىڭ كوماندا ءۇشىن ەڭ باستىسى ولشەۋسىز تاجىريبە بەرسە, سونىمەن قاتار جەڭىسكە دەگەن جىگەردى كوتەردى. دەمەك, بۇل ناتيجەلەردى كەلەشەكتەن كۇتەتىن ۇلكەن جەڭىستەردىڭ يگى باستاماسى دەپ بىلەمىز.
ال ۇلتتىق چەمپيوناتتا التىنشى رەت باق سىناعان «استانا» تۇڭعىش رەت التىن مەدال يەگەرى اتاندى. بولگاريانىڭ بىلىكتى مامانى ستانيمير ستويلوۆ باپتاعان ەلوردالىق ۇجىم سوناۋ ەرتە كوكتەمدە باستالعان چەمپيوناتتىڭ ءار ويىنىندا كوماندالىق جيناقىلىق كورسەتىپ, وزىمەن ۇزەڭگىلەسىپ شاپقان «اقتوبە», «قايرات» جانە «شاحتەر» كوماندالارىن چەمپيونات سوڭىنداعى شەشۋشى ويىنداردا شاڭ قاپتىرىپ كەتتى دەسە بولادى. «استانا» كومانداسىنىڭ بىرنەشە ويىنشىلارى «قازاقستان چەمپيوناتىنىڭ ۇزدىك 33 ويىنشىسى» قاتارىنان كورىندى. «استانا» قۇرامىندا وينايتىن وڭتۇستىك افريكا رەسپۋبليكاسى قۇراماسىنىڭ ويىنشىسى فوكسي كەتەۆواما قازاقتان چەمپيوناتىندا 16 گول سوعىپ, ۇزدىك مەرگەن فۋتبولشى ءارى ۇزدىك لەگيونەر فۋتبولشى بولىپ تانىلدى.
«استانا» كومانداسىنىڭ بىرنەشە فۋتبولشىسى قازاقستان ۇلتتىق قۇراماسىندا دا جاقسى ويىن ورنەگىن كورسەتىپ كوزگە ءتۇستى. قايرات نۇرداۋلەتوۆ, تانات نوسەرباەۆ, باۋىرجان دجولچيەۆ, دميتري شومكو, ابزال بەيسەبەكوۆ, ۆالەري كوروبكين, ەلدوس احمەتوۆ سىندى جىگىتتەر ەل نامىسىن قورعايتىن ويىندارعا قاتىستى.
بۇگىنگى تاڭدا «استانا» كومانداسى 2015 جىلعى چەمپيوناتقا ازىرلىكتى باستاپ كەتتى. العاجەلتوقسان ايىنىڭ 10 – 20 ارالىعىندا انتاليادا العاشقى وقۋ-جاتتىعۋ جيىنىن دا وتكىزىپ كەلدى. نەگىزگى ويىنشىلارمەن قاتار بىرنەشە جاس فۋتبولشىلاردى سىناقتان وتكىزدى. الداعى جىلدىڭ 4 – 24 قاڭتار ارالىعىندا بىرىككەن اراب امىرلىكتەرىندە ەكىنىشى جاتتىعۋ جيىندارىن وتكىزۋدى جوسپارلاپ وتىر.
2014 جىلدىڭ چەمپيونى «استانا» كومانداسى ءۇشىن 2015 جىل ۇلكەن ماقساتتار جىلى بولماق. بىرىنشىدەن, ەل ۋەفا-نىڭ چەمپيوندار ليگاسىندا ەل نامىسىن قورعايتىن بولادى. سونىمەن قاتار, قازاقستان چەمپيونى اتاعىن ساقتاپ قالۋعا كۇش سالادى. ال, ءبىز بولساق, سۇيىكتى كوماندامىزدىڭ جەڭىستى ساتتەرىنە قۋانىپ جۇرە بەرگىمىز كەلەدى. ولاي بولسا, جىلدىڭ ۇزدىك سپورت ۇجىمى اتانعان «استانا» كومانداسىنا ساتتىلىك تىلەيمىز.
عالىم قوجابەكوۆ
