استانادا ءداستۇرلى «بۇرقاسىن-2015» شاڭعى فەستيۆالى ءوتتى. ۇلى جەڭىستىڭ 70 جىلدىعىنا, قازاق حاندىعىنىڭ 550 جىلدىعىنا, قازاقستان حالقى اسسامبلەياسىنىڭ جانە قازاقستان رەسپۋبليكاسى كونستيتۋتسياسىنىڭ 20 جىلدىعىنا ورايلاستىرىلىپ وتكىزىلگەن بۇقارالىق سپورت شاراسىنا 3000-نان استام استانالىقتار مەن قالا مەيماندارى قاتىستى. ءداستۇرلى شارانىڭ اشىلۋ راسىمىندە ءماجىلىس دەپۋتاتى, گەنەرال-لەيتەنانت اباي تاسبولاتوۆ, قر مادەنيەت جانە سپورت مينيسترلىگى سپورت كوميتەتىنىڭ توراعاسى ەلسيار قاناعاتوۆ جانە استانا قالاسى تۋريزم, دەنە تاربيەسى جانە سپورت باسقارماسىنىڭ باسشىسى بەرىك مارجىقباەۆ بارلىق قاتىسۋشىلاردى سپورت مەرەكەسىمەن قۇتتىقتاپ, جارىس جولىنا شىققان ءاربىر قاتىسۋشىعا زور دەنساۋلىق جانە ساتتىلىك تىلەدى. اشىق اسپان استىندا قازاقستان ءانۇرانى شارىقتاپ, لەك-لەگىمەن جارىستار باستالدى.
ەسىل وزەنى ۇستىندەگى شاڭعى جولدارى, مۇز ايدىنىنداعى شاڭعى جارىستارى مەن حوككەي ويىنىنا, اق قارداعى الاڭقايلاردا وتكەن بالۋاندار بەلدەسۋى مەن كىر تاسىن كوتەرۋ سايىستارىنا, اشىق اسپان استىندا ويىقتان بالىق اۋلاۋ جانە ارقان تارتىس باسەكەلەرىنە مەكتەپ وقۋشىلارى, جوعارى وقۋ ورىندارى وقىتۋشىلارى مەن ستۋدەنتتەرى, مينيسترلىكتەر مەن ۆەدومستۆولار, قالالىق مەملەكەتتىك قۇرىلىمدار مەن كاسىپورىندار قىزمەتكەرلەرى, اسكەريلەر مەن قوعامدىق ۇيىمداردىڭ وكىلدەرى, سونداي-اق, قالا قوناقتارى قاتىستى. وسى رەتتە, ءبىر ايقىنداپ ايتارىمىز, «بۇرقاسىن» – بۇل, ەلوردامىزداعى وتباسىلىق جانە كورپوراتيۆتىك دەمالىستىڭ ۇزدىك تۇرلەرىنىڭ بىرىنە اينالىپ وتىرعان بۇقارالىق شارا. بيىل 13-رەت وتكىزىلدى.
قىستىڭ سوڭعى كۇنىندە وتكەن مەرەكەلىك شارا حالىقتىڭ كوڭىل-كۇيىن تاڭەرتەڭنەن بيىككە كوتەرگەندەي بولدى. تۋريزم, دەنە تاربيەسى جانە سپورت باسقارماسى ماماندارى دايىنداعان سالتاناتتى ساحنا, اقشاڭقان كيىز ءۇي, كوتەرىلگەن قازان, تاماقتانۋ اۋلاسى – ءبارى-ءبارى قايناعان تىرشىلىكتىڭ كورىنىسىن كوز الدىڭا اكەلەدى.
كۇن ساۋلەسىمەن شاعىلىسقان اق قارداعى ءىزدىڭ ۇستىنە تۇسكەن العاشقى شاڭعىشىلار دا جارىس جولىنا شىقتى. كوپشىلىكتىڭ قوشەمەتىنە كەنەلگەن بۇل باسەكەدە مارە سىزىعىن ءبىرىنشى بولىپ پارلامەنت دەپۋتاتى, گەنەرال-لەيتەنانت اباي تاسبولاتوۆ كەستى. نيكولاي دريۋتوۆ باستاعان استانا قالاسى سپورتىنىڭ ارداگەرلەرى دە شاڭعى جارىسىندا جەڭىسكە دەگەن جىگەرىمەن جاستارعا ونەگە كورسەتتى.
– بۇگىن – استانا ءۇشىن وتە جاقسى كۇن. ەلوردامىزدىڭ اكىمدىگى مەن قالالىق تۋريزم, دەنە تاربيەسى جانە سپورت باسقارماسىنىڭ ۇيىمداستىرۋىمەن ءوتىپ جاتقان شاڭعى مەرەكەسى وتە پايدالى شارا بولىپ وتىر. ءوزىم جىل سايىن قاتىسامىن. بيىلعى مەرەكەلىك جارىستارعا ءۇش مىڭعا جۋىق ادام قاتىسىپ جاتىر دەگەندى ەستىپ قۋانىپ تۇرمىن. زەينەتكەرلەر دە بار ەكەن, جاستار كوپ ەكەن. ادامنىڭ دەنساۋلىعىن شىڭدايتىن ءارى قالانىڭ تىرشىلىگىن تۇرلەندىرەتىن وسىنداي شارالار كوبىرەك بولسا ەكەن دەپ تىلەيمىن. مۇنداي جارىستا جەڭىلەتىندەر بولمايدى دەپ ويلايمىن. ويتكەنى, قاتىسۋشىلاردىڭ ءبارى دە كوتەرىڭكى كوڭىل-كۇيگە بولەنەدى, سەرگەك جۇرەدى. باستى بايلىقتى وسىلاي كۇتۋىمىز كەرەك, – دەپ اعىنان جارىلدى مەرەكەلىك شارانى اشقان ءارى العاشقى جارىسىندا توپ جارعان اباي تاسبولاتوۆ مىرزا.
جارىس باعدارلاماسىنا سايكەس ەرلەر, ايەلدەر, جىگىتتەر, قىزدار, بالالار, زەينەتكەرلەر جانە مۇمكىندىگى شەكتەۋلى جاندار اراسىنداعى جارىستار وتكىزىلدى. ءداستۇرلى شاڭعى جارىسىنىڭ جەڭىمپازدارى ديپلومدار مەن ەستەلىك سىيلىقتارعا يە بولدى.
– «بۇرقاسىن» فەستيۆالى وتە جاقسى ءوتتى. مەنىڭ جاسىم 70-تەن اسىپ كەتكەن. دەگەنمەن, بۇگىن وسى مەرەكەلىك جارىستارعا قاتىستىم. جان-جاعىما قاراسام, بارلىق ادامداردىڭ جۇزدەرىنەن قۋانىش كورىنەدى. بالالار دا, جاستار دا كوپ ەكەن. بۇل دا قۋانىشتى جاعداي. وسىلار عوي ەلىمىزدىڭ بولاشاعى. سوندىقتان ولاردىڭ سالاۋاتتى ومىرگە جاقىن بولعانىن قالايمىن. دەندەرى ساۋ, باقىتتى بولسا ەكەن دەپ تىلەيمىن. شاڭعى فەستيۆالىن وسىنداي قىزىقتى ەتىپ وتكىزىپ جاتقان قالالىق تۋريزم, دەنە تاربيەسى جانە سپورت باسقارماسىنا ريزاشىلىعىمدى بىلدىرگىم كەلەدى. استانامىزدا وسىنداي يگى شارالار ءجيى ءوتىپ تۇرسا دەگەن تىلەگىم دە بار, – دەدى مەرەكەگە وزىمەن بىرگە نەمەرەلەرىن ەرتە كەلگەن سپورت ارداگەرى ايسۇلتان جاقىپبەكوۆ اعامىز.
سونىمەن, استانا تورىندە قىستى شىعارىپ, كوكتەمدى قارسى العان, كوپشىلىكتىڭ كوڭىلىن كوتەرگەن ءداستۇرلى «بۇرقاسىن» مەرەكەلىك شاڭعى فەستيۆالى دە ءوز مارەسىنە جەتتى.
