استانادا الداعى ۋاقىتتا 30-دان اسا «ساقالدى» تۇرعىن ءۇي كەشەنىنىڭ قۇرىلىسى اياقتالادى. ەلورداداعى ۇلەستىك قۇرىلىس نىساندارىن ارالاعان استانا قالاسىنىڭ اكىمى جەڭىس قاسىمبەك وسىنداي مالىمدەمە جاسادى.
ول جۋىردا ءتورت كوپپاتەرلى تۇرعىن ءۇي كەشەندەرىنىڭ ۇلەسكەرلەرىمەن كەزدەستى. «ۇلەستىك قۇرىلىس نىساندارىن ارالاۋ بارىسىندا ءتورت كوپپاتەرلى تۇرعىن ءۇي كەشەنىنىڭ ۇلەسكەرلەرىمەن كەزدەستىم. ولار: «ميرنىي دوم», «تۇران سىعاناق», «تەرريتوريا كومفورتا-1» (2 كەزەك), «حازار». ۇلەسكەرلەردىڭ جالپى سانى 1200-دەن استام وتباسىنى قۇرايدى. نىسانداردىڭ وتكەن تاريحى ءارتۇرلى. ماسەلەن, «ميرنىي دوم» تۇرعىن ءۇي كەشەنى 10 جىل بۇرىن پروبلەمالى دەپ تانىلعان. نىساندى «ەلوردا قۇرىلىس كومپانياسىنا» تاپسىرار كەزدە قۇرىلىسى ءنول دەڭگەيىندە بولاتىن. «تەرريتوريا كومفورتا-1» تۇرعىن ءۇي كەشەنى (2 كەزەك) تىپتەن اپاتتى دەپ تانىلىپ, ۇيلەردىڭ بلوكتارى بۇزىلدى. تيىسىنشە قۇرىلىسى باسىنان قايتا باستالدى. «تەرريتوريا كومفورتا» تۇرعىن ءۇي كەشەنىنىڭ ءبىرىنشى كەزەگىنىڭ قۇرىلىسى اياقتالىپ, ۇلەسكەرلەرگە پاتەر كىلتتەرى تاپسىرىلدى. قازىر ەكىنشى كەزەك بويىنشا جۇمىس جۇرگىزىلىپ جاتىر» دەپ ءتۇسىندىردى ج.قاسىمبەك.
وسىعان دەيىن اكىمدىك قۇرىلىسى ۇزاققا سوزىلعان نىسانداردى اياقتاۋ بويىنشا جۇيەلى جۇمىس جۇرگىزگەن. «دەگەنمەن الدىمىزدا تاعى 30-دان اسا تۇرعىن ءۇي كەشەندەرىنىڭ قۇرىلىسىن اياقتاۋ مىندەتى تۇر. وندا مىڭداعان ۇلەسكەرلەر وتباسى ءوز پاتەرلەرىن جىلدار بويى كۇتىپ ءجۇر. قۇرىلىس ساپاسىنا ەرەكشە نازار اۋدارا وتىرىپ, جۇمىس قارقىنىن ارتتىرۋدى تاپسىردىم. قۇرىلىسى ۇزاققا سوزىلعان نىسانداردى اياقتاۋ – اكىمدىكتىڭ باستى مىندەتتەرىنىڭ ءبىرى» دەدى قالا باسشىسى.
