جۋىردا قازاقستان مۇسىلماندارى ءدىني باسقارماسىنىڭ نايب ءمۇفتيى سەرىكباي قاجى ورازدىڭ توراعالىعىمەن وتكەن القا ماجىلىسىندە ورىس ءتىلدى ۋاعىز-ناسيحات توبىن قۇرۋ تۋرالى شەشىم قابىلدانعان ەدى.
وسىعان وراي, 20-27 مامىر ارالىعىندا وڭىرلەردەن كەلگەن 20 يمامعا يسلام قۇندىلىقتارىن ورىس تىلىندە جەتكىزۋ تاقىرىبىندا سەمينار جۇرگىزىلدى. ەلوردا يمامدارى مەن مەدرەسە ۇستازدارى, ءدىن ىستەرى باسقارماسى ماماندارى قولعا العان سەميناردىڭ العاشقى دارىستەرىن «نۇر استانا» مەشىتىنىڭ نايب يمامى ابدۋساماد ماحات پەن «ازىرەت سۇلتان» مەشىتىنىڭ ۇستازى ماقسات قايىرعاليەۆ وتكىزىپ, وندا «حاديس ءىلىمىنىڭ شىعۋ تاريحى» مەن «مازحابتاردىڭ پايدا بولۋى» جايىندا ءدارىس ايتىلدى.
اپتاعا سوزىلعان سەميناردا اقيدا, فيقھ ءىلىمى, ءتاپسىر ادىستەمەسى, حانافي مازحابى قاعيدالارى, شەشەندىك ونەر جانە تاعى دا باسقا وزەكتى تاقىرىپتار تالقىلاندى. سونداي-اق, برەين-رينگ, ديسپۋتتار جانە بەينەسۇحبات (ۋاعىز) بەرۋ تاسىلدەرى جايىندا دارىستەر وتكىزىلىپ, قاتىسۋشى يمامدار سەميناردا جۇرگىزىلگەن ساباقتارعا ريزاشىلىعىن ءبىلدىردى. كەشە اپتالىق سەمينار قورىتىندىلانىپ, قمدب-نىڭ باس ءمۇفتيى ەرجان قاجى مالعاجىۇلىنىڭ اتىنان ارناۋلى سەرتيفيكاتتاردى قمدب-نىڭ استانا قالاسى بويىنشا وكىلى, «نۇراستانا» مەشىتىنىڭ باس يمامى ناۋرىزباي وتپەنوۆ قاتىسۋشىلارعا تابىستادى.
