ەلوردادا جارىق كورەتىن قازاق تىلىندەگى مەرزىمدى باسىلىمداردىڭ سانى تاعى ءبىر گازەتپەن تولىقتى: الماتىدان «ايقىن» گازەتى رەداكتسياسى كوشىپ كەلدى.
«ايقىن» – قازاق ءباسپاسوز ايدىنىندا سوڭعى 14 جىلدان بەرى ۇزدىكسىز جارىق كورىپ كەلە جاتقان باسىلىم. بۇگىندە بۇل گازەت اپتاسىنا 4 رەت شىعادى.
2004 جىلدىڭ 6 ناۋرىزىنان بەرى سەرىك جانبولات, باۋىرجان ومارۇلى سەكىلدى قازاق جۋرناليستيكاسىنداعى بەلگىلى تۇلعالار باسقارعان گازەتتىڭ بۇگىنگى باس رەداكتورى – تالاي جاس ءجۋرناليستىڭ تۇساۋىن كەسكەن قازاقستان رەسپۋبليكاسى پرەزيدەنتى سىيلىعىنىڭ يەگەرى, قازاقستاننىڭ ەڭبەك سىڭىرگەن قايراتكەرى نۇرتورە ءجۇسىپ.
2005 جىلى پرەزيدەنت العىس حاتىمەن, 2006 جىلى «التىن جۇلدىز», 2017 جىلى «ۇزدىك رەسپۋبليكالىق ءباسپاسوز باسىلىمى» نوميناتسياسىندا «ۇركەر» ۇلتتىق سىيلىعىمەن ماراپاتتالعان باسىلىم قازىر دە العان باعىتىنان تايماي, ساياسات, ەكونوميكا, الەۋمەت, مادەنيەت تاقىرىپتارىندا وزەكتى ماسەلەلەر كوتەرىپ, بەدەلىنە بەدەل قوسىپ كەلەدى. گازەتتىڭ ءار نومىرىندەگى ماقالالار ءتۇرلى ساراپتامالىق شولۋلاردا, پىكىرتالاستاردا نەگىزگى تاقىرىپقا ارقاۋ بولىپ كەلەدى.
كەشە «استانا اقشامى» گازەتى ۇجىمى الماتىدان كەلىپ جاتقان «ايقىن» رەداكتسياسىن جاڭا قونىسىمەن قۇتتىقتاپ, شاشۋ شاشىپ باردى. استانالىقتار قاتارىنا قوسىلعان ارىپتەستەرىمىزگە شىعارماشىلىق تولايىم تابىس تىلەيمىز!
