ءجاسوسپىرىم بالانىڭ قالاداعى قۇدىققا قۇلاپ قازا بولۋىنا جانە بوسانۋ بولىمىندە كەلىنشەكتىڭ ەدەندە بوسانىپ قالۋىنا بايلانىستى قالا اكىمى باقىت سۇلتانوۆ ۋاكىلەتتى تۇلعالارعا تارتىپتىك جازا بەلگىلەپ, قاتاڭ سوگىس جاريالادى.
«19 اقپاندا تاعى ءبىر قايعىلى وقيعا ورىن الدى. 13 جاسار ءجاسوسپىرىم قالاداعى اشىق قۇدىققا قۇلاپ, قازا تاپتى. توتەنشە جاعداي وتكەندەگىدەي الماتى اۋدانىنىڭ اۋماعىندا ورىن الدى. اشىق قۇدىق «استانا سۋ ارناسى» مەملەكەتتىك كاسىپورنىنا تيەسىلى. وسىدان بىرنەشە اي بۇرىن ءجاسوسپىرىم قىز ءدال وسىنداي جاعدايدا قايتىس بولعاندا اۋدان اكىمدەرىنە قاتاڭ سوگىس جاريالاۋمەن عانا شەكتەلىپ ەدىك. بۇل جازالاۋ سىزدەرگە از سياقتى! ەندەشە الماتى اۋدانىنىڭ اكىمى ادىلبەك سارسەمباەۆقا قاتاڭ سوگىس جاريالايمىن» دەدى قالا اكىمى.
وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى باسشىسىنىڭ ورىنباسارى يگور الەكسەەۆكە, «استانا سۋ ارناسى» مكك ديرەكتورى تابيعات زەينۋلقابدەنگە, كارىز قىزمەتىنىڭ باسشىسى قۋانىش سۇلتانباەۆ پەن الماتى اۋدانى كارىز ۋچاسكەسىنىڭ باسشىسى ۆلاديمير ۆلاسەنكوعا وسىنداي جازا بەلگىلەندى. قالالىق قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ءاليا رۇستەموۆا دا ەلوردا اكىمىنەن سوگىس الدى.
سونىمەن قاتار باقىت سۇلتانوۆ 19 اقپانداعى №2 پەريناتالدىق ورتالىقتا بولعان جان تۇرشىگەرلىك وقيعانى دا تىلگە تيەك ەتتى. ورتالىقتىڭ بوسانۋ بولىمىندە كەلىنشەك دارىگەرلەردىڭ كومەگىنسىز ءوزى ەدەندە بوسانىپ قالدى. ابىروي بولعاندا, بالا مەن انانىڭ دەنساۋلىعىنا زيان كەلمەگەن. سونىمەن قاتار اكىم 2018 جىلى بوسانۋ كەزىندە سەگىز ايەلدىڭ قايتىس بولعانىن, وقيعالار سانىنىڭ 2017 جىلعى كورسەتكىشتەن ءتورت ەسە جوعارى ەكەندىگىن العا تارتىپ, ءا.ءرۇستەموۆاعا رەسمي تۇردە ەسكەرتۋ جاسادى.
