وزبەكالىنىڭ قايشىسى
استاناداعى ۇلتتىق مۋزەيدىڭ قورىندا كورنەكتى مەملەكەت جانە قوعام قايراتكەرى وزبەكالى جانىبەكوۆتىڭ «تسەنزور» قايشىسى مەن باكىسى ساقتالعان.
بۇل جادىگەرلەردى مۇراجايعا 2015 جىلى الماتىدا وتكەن «ۇلتتىق مۋزەيگە سىي تارتۋ» اكتسياسىندا ارداقتى تۇلعانىڭ نەمەرەسى ازەل باۋىرجانقىزى تاپسىرعان.
وزبەكالى اعامىزدىڭ ۇلت مادەنيەتىنىڭ دامۋىنا قوسقان ۇلەسى مول. ول كىسى وتكەن عاسىردىڭ 70-شى جىلدارى قوجا احمەت ياساۋي كەسەنەسىنىڭ قالپىنا كەلتىرۋىنە ۇيتقى بولدى. ونىڭ باستاماسىمەن ەلىمىزدىڭ كوپتەگەن قالالارىندا تاريحي-ەتنوگرافيالىق مۇراجايلار اشىلىپ, «شەرتەر», «ادىرنا», «التىناي» جانە ت.ب. فولكلورلىق انسامبلدەرى ۇيىمداستىرىلدى. «ناۋرىز» مەيرامىن العاش تويلاۋعا دا كۇش سالدى. سونداي-اق ول جاريالىق جەلى وڭىنان سوققان كەزدە الاش ارىستارى ەسىمدەرىن اقتاۋعا دا بەلسەنە اتسالىستى.
قايراتكەردىڭ «وتكىر قايشىسى» تۋرالى اڭىز كوپ. ول كىسى الدىنا كەلگەن قۇجاتتاردان قاتە كورسە, ءدال وسى قايشىمەن ورتاسىنان قاق بولەدى ەكەن. بۇل جايىندا بەلگىلى عالىم-سىنشى قۇلبەك ەرگوبەكتىڭ «باس مۋزەيشى» اتتى ماقالاسىندا اسەرلى باياندالعان. «مۋزەي ىسىندە ەكسپوزيتسيالىق جوسپار جاسالادى. ادەتتە, وزەكەڭ جاساقتالىپ جاتقان مۋزەي قىزمەتكەرلەرىن سەنبى نە جەكسەنبىگە شاقىراتىن. شاقىرعان ۋاقىتىندا بارامىز. جازعانىمىزدى الدىنا قويامىز. ول كىسى شيمايلاي باستايدى. ءبىزدىڭ باستاپقى جازۋىمىزدان تامتىق تا قالمايدى. ءبىزدى قويشى, قىزدى-قىزدىمەن ءوزى جازعان بەتتەردى دە قايتا شيمايلاۋعا كىرىسەدى. «وزىمەن بىرگە جاساسىپ كەلە جاتقان» (م.جولداسبەكوۆ) ۇزىن قايشىسى بولادى. سونىمەن الگى جازىلعان پاراق-پاراق جازۋلاردى قىرقادى, جەلىمدەيدى, ماشينكاعا بەرەدى. تاسقا باسىلىپ, قايتا ورالىپ كەلگەن ءماتىندى قايتا جوندەيدى. «اپىر-اي, بۇل كىسى دە شارشاي ما ەكەن؟» دەپ ويلايتىنبىز ءارى-بەرىدەن سوڭ…» دەپ جازادى قۇلبەك اعامىز.