– بيىل «نۇر وتان» پارتياسىنىڭ قۇرىلعانىنا 20 جىل تولىپ وتىر. پارتيا ءوزىنىڭ باعدارلاماسىندا العاشقى كۇننەن باستاپ قوعامداعى الەۋمەتتىك ماسەلەلەردى نازاردان تىس قالدىرعان ەمەس. ەلباسىنىڭ سوزىمەن ايتقاندا, «نۇر وتان» پارتياسى بۇل – ەليتارلىق پارتيا ەمەس, كەرىسىنشە, حالىقتىڭ مۇڭ-مۇقتاجىن, حالىقتى الەۋمەتتىك جاعىنان بارىنشا قورعايتىن بۇقارالىق پارتيا. بۇگىنگى سەزدە «نۇر وتان» پارتياسى تاعى دا ءوزىنىڭ باستى باعىتى – الەۋمەتتىك باعىتى ەكەنىنىن دالەلدەپ, قازاقستاندىقتاردىڭ ءومىر ساپاسىن ارتتىرۋ جۇمىسىنا ەرەكشە نازار اۋداردى. ناقتىراق ايتقاندا, «نۇر وتان» پارتياسى ەل ىشىندەگى الەۋمەتتىك سالاعا قاتىستى ماسەلەلەردى تالداپ, 2030 جىلعا دەيىنگى ءوزىنىڭ دامۋ باعدارلاماسىن ۇسىندى. باعدارلامادا حالىققا 2019-2021 جىلدار ارالىعىندا ءار بالاعا بەرىلەتىن جەكە الەۋمەتتىك كومەك كولەمىن كەم دەگەندە 21 مىڭ تەڭگەگە دەيىن كوتەرەتىندىگىن جانە قۇجات جيناۋ بارىسىندا حالىقتى اۋرە-سارساڭعا سالماي «ءبىر تەرەزە» قاعيداسىمەن قىزمەت كورسەتۋ, كوپبالالى وتباسىنا باسپانا الۋ ءۇشىن تومەن 2-3 پايىزبەن نەسيە بەرۋ سەكىلدى, الەۋمەتتىك ماڭىزى بار ءىس-شارالار قابىلدايتىنى تۋرالى ايتىلدى. وسى ماقساتتا ۇلتتىق قوردان جانە ۇكىمەت تاراپىنان 4,3 ملرد قوسىمشا قارجى بولىنەتىن بولدى.
سونىمەن قاتار, «تۋعان جەر», «قۇتتى مەكەن» جوبالارىن بىرتىندەپ جۇزەگە اسىراتىنى تۋرالى ەلباسى مالىمدەدى. قازاقستان حالقىنىڭ ءومىر ءسۇرۋ دەڭگەيىن جاقسارتۋ ءۇشىن قالا مەن اۋىلدى جەرلەردىڭ ايىرماشىلىعىن ازايتۋ, ول ءۇشىن اۋىلدى جەرلەردە كاسىپكەرلىكتى دامىتۋ تۋرالى تاپسىرما بەرىلدى. وسىنىڭ بارلىعى دا پارتيانىڭ بۇدان 20 جىل بۇرىن قابىلداعان الەۋمەتتىك ساياساتتان اۋىتقىمايتىندىعىن تاعى دا ءبىر كورسەتتى.
ايتا كەتەتىن تاعى دا ءبىر ماسەلە, ەلباسى سەزدە ءبىلىم مەن دەنساۋلىق ساقتاۋ سالاسىنا دا توقتالىپ كەتتى. ءبىلىم سالاسىندا ءۇش تىلدىلىكتى ودان ءارى جالعاستىرۋ كەرەكتىگىن, بىراق تا, بۇل ىستە بايىپپەن ويلانىپ ارەكەت ەتۋدى تاپسىردى. دەنساۋلىق سالاسىندا دا العاشقى مەديتسينالىق كومەك كورسەتۋ پۋنكتەرىن بارىنشا كوبەيتۋ كەرەكتىگىنە توقتالىپ ءوتتى. ءبىر سوزبەن ايتقاندا, كونستيتۋتسيادا كورسەتىلگەندەي, قازاقستان ءوزىن الەۋمەتتىك مەملەكەت رەتىندەگى بارلىق جاۋاپكەرشىلىكتەرىن جالعاستىرا بەرەتىندىگى تۋرالى ايتىلدى.
